أبرز تصريحات سارة عبد الرحمن: اشتغلت أكتر من شغلانة علشان الفلوس وكل اللي بيدخلوا حياتي بيغيروا من نجاحي
تحدثت الفنانة سارة عبد الرحمن، عن بداية مشوراها الفني ومشاركتها مع أحمد حلمي في فيلم ألف مبروك، إلى جانب حديثها عن مواصفات شريك أحلامها ونصيحة الفنانة الراحلة دلال عبد العزيز لها وعيرها من الأمور.
وقالت سارة عبد الرحمن خلال استضافتها في برنامج الستات ما يعرفوش يكذبوا: درست مسرح وفيلم ألف مبروك كان أول دور ليا مع أحمد حلمي، وحلمي وقتها قرر يعمل فيلم فيه ناس مش معروفين وكان فيه أوديشن تلات مرات وعلى مدى شهرين كانوا بيختاروا وكان فيه تصفيات وكان حلم من أحلامي اشتغل في الفيلم، وكان زملائي كلهم بيتريقوا عليا علشان بحب أحمد حلمي ودخلت فيلم كده رضا خمس مرات وبعدها جت الفرصة دي.
وكشفت سارة عبد الرحمن، أنها عملت في أكثر من مهنة قبل التمثيل قائلة: كنت بشتغل مدرسة واشتغلت في التسويق والإعلانات لأني كنت حابة إني أكون مستقلة ويكون معايا فلوسي وكانت فيه صراعات مع أهلي واشتغلت حاجات كتير علشان يكون معايا فلوس.
سارة عبد الرحمن تكشف مواصفات شريك أحلامها
وقالت سارة عبد الرحمن، إنها لا تفكر في الارتباط الفترة الحالية قائلة: الفترة الحالية مركزة في شغلي وأني احتوي نفسي ولو لقيت بالصدفة حد زي ما أنا متخيلة ممكن أفكر.
كما كشفت مواصفات شريك أحلامها، مشيرة إلى أنها قابلت شخصيات غير واثقين في أنفسهم وكانوا يغيرون من نجاحها قائلة: نفسي يكون واثق في نفسه لأن اللي بييجوا مش واثقين وبيقولوا إيه ده انت ممثلة الناس بتعرفك ده بيهزهم وبيغيروا من نجاحي وشعلي وقعت في كذا تجربة كده نفسي في حد يكون واثق في نفسه ونرفع بعض لفوق ونزق بعض لقدام.
سارة عبد الرحمن تتحدث عن دلال عبد العزيز
وقالت سارة عبد الرحمن عن الفنانة الراحلة دلال عبد العزيز، والتي تعاونت معها في مسلسل سابع جار: اتشرفت أني عرفتها وضافت ليا كتير خلال عشر شهور تصوير، وكانت بتسلم عليا وبتتطمن عليا وبتسألني لو أنا محتاجة فلوس، والحمد لله أني قابلت هذا الإنسان، لأنها كانت ملاك وفي مرة كنت في برنامج وقلت بالغلط سني، ونصحتني ما أقولش سني ولا أعرفه لحد وفعلًا الأجيال اللي قبلنا كانت بتلتزم بكده.
وكشفت سارة عبد الرحمن النصائح التي قدمت لها وأخذت بها، قائلة: في حد قال لي خليكي لطيفة مع كل الناس لأنه سهل يحصل عدائات والسوق مش سهل وأنا كنت عصبية خاصة أن الواحد وهو صغير بيتعرض لاستفزاز والممثلين الصغيرين بيتهدلوا علشان كده محتاجين ضبط نفس وصبر وأمل.
وكشفت سارة عبد الرحمن أنها تأثرت جدًا بشخصيتها في مسلسل سابع جار، قائلة: الشخصية علمتني حاجات وخدت منها حاجات والشخصية كانت يتعمل اللي هي عايزاه وأنا مختلفة رغم أني عندي تمرد لكن بعمل حساب لأهلي لكن المختلف أن الشخصية كانت مصرة وبتعبر عن نفسها طول الوقت وخدت منها حاجات كتير.
سارة عبد الرحمن تنفي خطبتها من عمرو جمال
كما نفت سارة عبد الرحمن خطبتها من الممثل عمرو جمال، مشيرة إلى أن الخطوبة في مسلسل ريفو، قائلة: الناس صدقت وقرايبي بعتوا لي، وكتبت على صفحتي أن ده في أحداث المسلسل وليه علاقة بأحداث مهمة في المسلسل.
وقالت سارة عبد الرحمن عن مسلسل ريفو: مسلسل رائع والشخصية صعبة بالنسبة لي لأنها شخصية تقيلة وأنانية وعنيفة وجواها غضب ومكابرة وشر حقيقي واتشرفت بالعمل مع أمير عيد والدور لايق عليه اوي.
