كريم الحسيني: أول ما وقفت قدام الكاميرا كنت مع الزعيم.. ومفيش حاجة اسمها نمبر وان وتو
علق الفنان كريم الحسيني على فكرة تريند رقم 1، إذ أشار إلى أنه يرفض هذه الفكرة، وأكد أن جميع النجوم يتنافسون من أجل تقديم عملًا فنيًا يليق بالجمهور، والمُشاهد هو من يحدد من هو رقم 1، حيث أشار إلى أنه له الشرف لوقوفه لأول مرة أمام كاميرا كانت مع الزعيم عادل إمام.
وتحدث كريم الحسيني عن هذا الأمر، خلال لقاء تلفزيوني له، إذ قال: الزعيم ده لوحده مش هيطلع زيه تاني، عادل إمام ظاهرة لن تتكر، فنان مُتربع على عرش النجومية 60 سنة مفيش زيه، ويفضل دايمًا بمجده، زي ما عندنا أم كلثوم وعبد الوهاب والعندليب عندنا عادل إمام، وليا الشرف أني اشتغلت معاه في أكتر من فيلم في بداية حياتي، منها فيلم المولد واللعب مع الكبار، وفيلم شمس الزناتي، ليا الشرف أني أول مرة أقف قدام كاميرا كان مع الزعيم.
وأضاف كريم الحسيني: كلنا نمبر وان، كلنا بنتنافس عشان نسعد الجمهور، لما هنبسط الجمهور هنكون سعداء، مش إحنا اللي هنحدد مين نمبر وان ولا مين تو، إحنا بنمثل عشان الناس تعرفنا، وتشاور علينا وتتأثر بينا، الحكم دائما بيكون للجمهور، والجمهور اللي بيحدد.
ومؤخرًا، شارك الفنان كريم الحسيني في فيلم الحب بتفاصيله، مع محمد نور وملك قورة، وتحدث في تصريحات سابقة له مع القاهرة 24، إذ قال: شاركت في فيلم الحب بتفاصيله بـ 3 أسامي مؤلف وممثل ومخرج، دوري راجل أعمال متجوز وقاعد في البحرين، وعامل جوز اخت محمد نور، والبطل بيكون مقدم على الزواج، وبيشوف علاقة أخته بجوزها، الكواليس كلها كوميديا ومقالب، ومحمد نور دمه خفيف جدًا، وكل الفنانين كان بينهم حب.
