أول ما بدأت مكنتش بمثل حلو وبميل للأدوار المركبة.. أبرز تصريحات أحمد فهمي
حل الفنان أحمد فهمي ضيفًا على الإعلامية إيمان الحصري، في برنامجها مساء DMC، وتحدث خلال اللقاء عن مهرجان العلمين الجديدة، ومشواره الفني، وتفاصيل أحدث أعماله التليفزيونية بعنوان بين السطور.
ونرصد لكم أبرز تصريحات أحمد فهمي في برنامج مساء DMC:
- مهرجان العلمين الجديدة بيقول للعالم هي دي مصر لأننا عندنا أجمل بحر في العالم ليه منستغلهوش؟ وحلو يكون عندنا مدينة كاملة زي العلمين ومهرجان فني بيعبر عننا وهيكون ناجح وفخر لينا جميعًا.
- أول ما بدأت تمثيل مكنتش بمثل حلو وبتحرك كتير، بعتبر أول دور أعمله كـ ممثل محترف في مسلسل الداعية لأني تعبت فيه وخسيت بسببه.
- أحمد فهمي حاطت صورتي عنده على واتساب بقاله 4 سنين علشان يلغبط الناس، وبيكلمني يقولي بقولك إيه يا فهمي المخرج الفلاني كلمك وعايزك في ورق، وهو بيتكلم كأنه أنا.. بس إحنا اتعودنا على الموضوع ده.
- بروح دايمًا للأدوار الغامقة مع إن في الحقيقة أصدقائي المقربين بيقولولي لازم تعمل لايت وكوميدي، بس أنا بحب الأدوار اللي بحب اتفرج عليها، يعني مبحبش اتفرج على كوميدي، ومبقبلش الأدوار اللي أغني فيها علشان الناس تفصل بين الغناء والتمثيل.
- في مسلسل قريب إن شاء الله، عامل فيه دور مركب أوي، وتعبني شخصيا، اسمه بين السطور، كتابة مريم نعوم، وإخراج وائل فرج، ومعايا صبا مبارك.
- بجسد في مسلسل بين السطور دور وكيل نيابة، بيبقى محامي، وبعد كده بيبقى في تطورات في الأحداث، وقعدنا شهرين بنشتغل على الورق، وقعدنا في تصوير المسلسل 3 شهور ونص أو 4 شهور.
- فرقة واما من يوم ما اتعملت سنة 2003 أصدرت 5 ألبومات، مش 20 أو 10 ألبومات، وبين كل ألبوم والثاني كنا بناخد وقت لأننا بنعمل كل شيء في الأغنية من كلمات وألحان وتوزيع بنفسنا، وكمان كل عنصر في الفرقة كانت له مشغوليات تانية منهم نادر حمدي كان يوزع أغاني عمرو دياب وشيرين وأنغام.
