وفاء مكي بعد خضوعها لعملية تكميم معدة: كنت خايفة أموت وأسيب ابني.. ملوش غيري
كشفت الفنانة وفاء مكي تفاصيل خضوعها لعملية تكميم معدة لإنقاص وزنها، مشيرة إلى أنها كانت مترددة من التجربة، بجانب الحديث عن أزمتها الأخيرة.
وقالت وفاء مكي لـ القاهرة 24: أنا عملت عملية تكميم وخسيت وإنقاص الوزن هيساعدني في الشغل، ولكن في النهاية التمثيل رزق من ربنا بس لما خسيت هقدر أعمل أي حاجة وأعمل إعلانات كمان.
وواصلت وفاء مكي: كنت خايفة من العملية؛ لأني خايفة أسيب ابني وهو مالهوش غيري وأموت، وبقيت أقرأ قرآن قبل العملية؛ ولأن العملية صعبة والواحد بيكون بين إيد ربنا.
وأضافت وفاء مكي: أنا عمري ما عملت عملية تجميل مفيش غير التكميم اللي عملتها ودي أول مرة، وبقيت صحيا ونفسيا أفضل، وببدأ صفحة جديدة في حياتي وخلافاتي مع ميار الببلاوي انتهت، وأنا بصالح الناس كلها وقلبي بيحب الناس كلها حتى اللي أذوني.
وفاء مكي: كافحت في الفن ومقدرش أسيبه
أما عن أزمتها الأخيرة، علقت وفاء مكي، قائلة: جميع الممثلين وقفوا جنبي في محنتي وأنا بحترمهم وهصور مسلسل قريبا عن المعالم السياحية وهعمل أغنية، وأنا بعشق الفن وتعبت وكافحت ومقدرش أسيبه لأني عملت اسمي وبقى صعب أكلم منتج عشان أشتغل.
كما علقت وفاء مكي على الانتقادات التي تتعرض لها على مواقع التواصل الاجتماعي: أنا أجهل السوشيال ميديا بس بزعل لما بلاقي ناس بيقولوا معلومات من أجل التريند بدون ما يعرفوا الحقيقة.
