أحمد ماهر لـ القاهرة 24: القُبلات في الأعمال ليس بها حرمانية.. واللي مش عاجبه يروح يشتغل في الأزهر
كشف الفنان أحمد ماهر، رأيه في المشاهد الجريئة والقبلات التي تقدم في الأعمال الفنية، مشيرًا إلى أنه يرى أنها ليس بها حرمانية، مستنكرًا حديث بعض الفنانين عن رفضهم القبلات.
وقال أحمد ماهر لـ القاهرة 24: القبلات أمر طبيعي، يعني ألغي القبلة وأكتب ولا أعمل إيه، وخلي اللي يقول يقول اللي بيقولوا مش فاهمين، والفن قيمته في ذاته وأنت كمشاهد لو ما عجبكش أنصرف عنه، ليه تعترض إيه تخصصك ومؤهلك، ده ربنا بيقول: لولا دفع الله الناس بعضهم ببعض لفسدت الأرض، يعني كل واحد له تخصص لكن اللي بيدعي أنه فاهم في كل حاجة يبقى إحنا عايشين في مفسدة.
وأضاف أحمد ماهر: لو فيه مشهد بين الاتنين زوج وزوجة أو رجل وعاهرة المفروض أترجم المشهد إزاي، ولو ما عملتش كده هل الجمهور بتاعي مش بيتفرج على أعمال أجنبية فيها ما هو أفظع من ذلك،.. ليه بننتقد هو إحنا أولياء ومفيش حرمانية في كده إطلاقا، والفنانين اللي هما ضد القبلات والتلامس يروحوا يشتغلوا في الأزهر.
أحمد ماهر يكشف رأيه في السينما
من ناحية أخرى، كشف الفنان أحمد ماهر، سبب غيابه عن السينما لسنوات، مشيرًا إلى أنه لا يعجبه وضه السينما حاليًا، وأن الأعمال التي تعرض عليه غير مهمة، قائلًا: لو شاركت في الأعمال التي تعرض عليا سأهدم تاريخي بالكامل.
واستكمل أحمد ماهر لـ القاهرة 24 متحدثًا عن رأيه في السينما: السينما أصبح إيقاعها مكسور والسيناريوهات التي تقدم أقرب إلى ما تكون من الفيديو كليب وأبعد ما تكون عن الأحداث السينمائية التي تحمل الإثارة والحدوتة والعبرة والدرس.
