اللي يخون ربنا هيخوني.. إنجي خطاب: مستحيل أتجوز راجل مش بيصلي حتى لو أغنى واحد في العالم
أعربت الفنانة إنجي خطاب، عن تخوفها من فكرة الزواج بشكل كبير، مشيرة إلى أن جميع زميلاتها اللاتي تزوجن انفصلن بعد فترة من زواجهن وبعد إنجابهن أطفالا ويعانين من مشاكل في محاكم الأسرة، إلى جانب حديثها عن مواصفات شريك أحلامها.
وقالت إنجي خطاب لـ القاهرة 24: اتخطبت تلات مرات ولكن لا أعلن ذلك على الملأ، لأن حياتي الخاصة مش بعلن عنها، ومنهم مرة لضابط شرطة وبيتعرض عليا عروض جواز لمجرد أني فنانة.
وأضافت: الموضوع بالنسبة لي مختلف شوية، لأن فكرة الجواز بتخوفني لأني بشوف صحابي اللي بيتجوزوا عن حب أو غير حب بيطلقوا ومعاهم عيال، وفي محاكم الأسرة فهي خطوة جريئة ومش عاوزة أخرج من علاقة معايا عيال وأكون مسؤولة عنهم لوحدي، أنا كبنت مسؤولة، ولكن لما تلاقي المجتمع كله بيتفصل والأم اللي بتشيل الطينة والراجل بيعيش حياته حاجة صعبة، ومش قادرة أعمل ده ولا عاوزة أخرج من جوازة بأطفال مشوهين.
إنجي خطاب تكشف مواصفات شريك أحلامها
وعن موصفات شريك أحلامها قالت إنجي خطاب: مواصفات شريك أحلامي صعب تكون موجودة في حد، لأني عاوزة راجل شبه أبويا لأن والدي كان متعلم ومثفف وعنده حنية وأمان وثقة وداعم لشغلي، لكن لو الراجل لاقاكي ناجحة يجيبك الأرض لأن الراجل ميحبش الست تكون أعلى منه، وأنا كنت مخطوبة لواحد كده كان عاوزني أكون مهمشة، مردفة: مش هتجوز واحد مش قادر يصرف عليا ومش هساعده حتى لو أنا شغالة وناجحة أمال انت ايه لازمتك مش قد الجواز ما تتجوزش.
وتابعت إنجي خطاب حديثها عن المواصفات التي تريد أن تكون في الشخص الذي ترتبط به: يكون مسؤول ومش خاين ولا كذاب ولكن للأسف تلات أربعهم كده، ويكون بيصلي لأن اللي مش بيصلي مش هيتقي ربنا في أي حد، واللي مش بيصلي هيخوني، لأنه خان حي على الصلاة فيقدر يخون أي حاجة في الدنيا.. فأنت خنت ربنا مش هتخوني أنا؟.
وأكدت إنجي خطاب أنها مستحيل أن تتزوج من شخص لا يصلي قائلة: أنا ممثلة وسايبة شعري بس بصلي لأن ربنا مش بياخد ذنب بذنب آخر، واللي مش بيخاف من ربنا ومش بيصلي يبقى مش هيخاف من حد ولا هيعمل حساب لحد، البني آدم اللي مش بيصلي مرعب، ومستحيل أتجوز واحد مش بيصلي حتى لو أغنى راجل في العالم، لأنه ما يتآمنش وأنا مش بدور على مادة ولا فلوس.
ووجهت الفنانة إنجي خطاب نصيحة للفتيات قائلة: المفروض تشوفي علاقته مع الناس عاملة إزاي جدع ولا مؤذي، بار بأهله ولا لأ، وأنا عمري ما هتجوز راجل قاسي مع عيلته لأن مالي وكل ما أملك باسم عيلتي دول اهلي واللي مش بار باهله مش ممكن تامينه على نفسك هتهوني عليه.
