محمد صلاح العزب: معندناش نوعية مسلسل السفاح من أيام ريا وسكينة.. ومبقدمش رسالة في أعمالي
قال السيناريست محمد صلاح العزب، إن جميع الفنانين الذين عٌرض عليهم مسلسل السفاح، بطولة أحمد فهمي تحمسوا للعمل، موضحًا أن نوعية الجريمة التي تدور حولها قصة العمل ليست موجودة في مصر منذ أحداث ريا وسكينة.
وأضاف محمد صلاح العزب خلال ندوته في القاهرة 24: كل اللي اتعرض عليه مسلسل السفاح كان متحمس له لأنه مفيش عندنا في مصر النوع ده، يعني مفيش السفاح بشكل الجرائم المتسلسلة اللي بياخد سنين من أيام ريا وسكينة، يعني نمط الجريمة نفسه مش موجود، والأعمال اللي قائمة على النوع ده من الجرائم قليلة، وده عمل مش هيتكرر كتير.
أما عن الرسالة التي يحملها مسلسل السفاح، فعلفق محمد صلاح العزب، قائلًا: أنا مبقدمش رسالة في الحاجات اللي بعملها، ولكن لو قولنا إيه الأفكار اللي هيقدمها العمل هتكون أول فكرة متعلقة بالثقة، ثق في الناس ولكن متبقاش ساذج، زي اللي حصل في مسلسل السفاح أن كلهم كانوا بيثقوا فيه لأنه كان كويس معاهم وعاش معاهم سنين طويلة، وهو مخادع لدرجة أنه مخدعش بس الضحايا بتوعه، هو كان عنده أكتر من شخصية عايش بيها في مجتمعات مختلقة، يعني هو كان خادع المجتمع كله حرفيًا.
وأكمل: لما اتقبض على السفاح الحقيقي كل اللي كانوا حواليه مكنوش مصدقين وقالوا التهم متلفقة ليه، وأنه مستحيل يكون عمل كده ده راجل بيحب الأطفال وبيتصدق وبيحب الحيوانات.
مسلسل السفاح
ويعد مسلسل السفاح آخر أعمال محمد صلاح العزب، ومن المقرر أن يُعرض خلال الأشهر المقبلة، عبر منصة شاهد الإلكترونية، ويضم العديد من النجوم أبرزهم أحمد فهمي، باسم سمرة، ركين سعد، وغيرهم من الفنانين، والعمل من إخراج هادي الباجوري.
