الجواز مينفعش يكون هدفًا ومبعرفش آخد حقي.. درة تكشف أسرارًا عن حياتها الشخصية لأول مرة
كشفت الفنانة درة العديد من الأسرار عن حياتها الشخصية لأول مرة، بجانب الحديث عن الزواج، كما وجهت العديد من النصائح للسيدات.
وقالت درة في تصريحات تليفزيونية: الجواز مينفعش يكون هدف حياة البنت ولو معملتش دا يبقى محققتش حاجة، بالعكس ممكن السنجل تكون مبسوطة وأنا عملت أغنية من زمان مع أبلة فاهيتا عشان أقول كدا، ومش لازم البنت تتجوز عشان تفرحوا بيها وممكن تفرحوا بنجاحها ودراستها.
وواصلت درة: أنا مكنتش رافضة الزواج أبدا، ولكني شخصية مترددة في كل شيء حتى في شغلي كمان حتى بعد ما آخد القرار ممكن أغير رأيي، أما عن إمكانية دخولها عالم الغناء، علقت درة، قائلة: أنا بحب المزيكا جدا والغناء ولكني مش مطربة.
كما تطرقت درة للحديث عن الحسد، قائلة: أنا بيحصلي حاجات كتير ومعرفش سببها يمكن قدر مش شرط حسد، وأنا معنديش كل حاجة عشان أتحسد وزي كل الناس مفيش سبب يخلي حد يحسدني.
درة: نفسي أثق في نفسي أكتر
وأضافت درة: أنا نفسي أثق في نفسي أكتر ولكن الناس بتفتكر إني مغرورة، ودا سببه إني بتكسف وفي حالي وبتكسف أكلم حد وأي حد يعرفني في الحقيقة بيعرف إني مش مغرورة أبدا، وخجولة جدا وعمري ما بشتم ولا بضرب ولا باخد حقي وبيكون نفسي آخد حقي لأني أكيد هقدر، وبقول لكل اللي بيهاجمونا على السوشيال ميديا وبيستحلوا الكلام عننا إن الفنانين مش بيردوا لأنهم بيترفعوا عن الجدال وبيتجاهلوا إنما مش معناه إنهم مش عارفين يردوا.
كما وجهت درة العديد من النصائح للسيدات بخصوص الموضة، قائلة: لازم المرأة تختار اللي يناسبها ويناسب استايلها وشخصيتها ومش مجرد تقليد وخلاص وتعرف تنسق الملابس والألوان بدون ما يكون مبالغ.
