لقاء سويدان: الفنان مش وظيفته يربي ولا يعلم.. وبنزعل من الأذية على السوشيال ميديا
تحدثت الفنانة لقاء سويدان عن سلبيات السوشيال ميديا، مشيرة إلى أن الجمهور بالكامل لن يتفق على فنان وله الحق في النقد دون تجريح.
وقالت لقاء سويدان لـ القاهرة 24: السوشيال ميديا صعبة جدا وطول الوقت الناس بتنظر وبتقول أحكام واللي عايز يشتم حد بيشتمه ومحدش له كبير والناس مستخبيه ورا حسابات وهمية وبيقولوا كلام بيضايقنا والفنان حساس جدا وبيتأثر بالكلمة.
وواصلت لقاء سويدان: وفيه فترة كانت كل الناس بتتهاجم على السوشيال ميديا، وبنزعل لما نكون بنعمل حاجة عشان نسعد الناس وفجأة نلاقي السلبيات دي على السوشيال ميديا، طب ليه الاذية؟
وأضافت لقاء سويدان: عمرنا ما هنرضى كل الناس، لأن لحد دلوقتي مش كل الناس متفقين على ربنا وفيه ملحدين وفيه بيعبدوا البقر والفنان مش أستاذ في وزارة التربية والتعليم ولا وظيفته يربي ولا يعلم الجمهور، ومن حق المشاهد ينقد العمل ولكن بدون تجريح.
واستكملت لقاء سويدان حديثها، قائلة: الجمهور اللي بقابله في الحياة لطيف وكلهم بيحبوني لكن على السوشيال ميديا مش بيكونوا وجها لوجه واحتمال يكونوا متخفيين ومش بنكون عارفين مين دول وهويتهم إيه واتجاهاتهم إيه.
آخر أعمال لقاء سويدان
وعلى جانب آخر، تعيش لقاء سويدان حالة من النشاط على المستوى الفني حيث شاركت في العديد من الأعمال الفنية التي حققت نجاحا كبيرا من بينهم مسلسل القاتل الذي أحبني بالتعاون مع هاني رمزي.
