ياسمين عز تخرج عن صمتها بشأن إبر التفتيح: هرجع لكم سمراء
خرجت الإعلامية ياسمين عز عن صمتها وتحدثت عن اتهامها بأخذ إبر ومنتجات لتفتيح بشرتها، خاصة بعد حلقتها مع رامز جلال في شهر رمضان ببرنامج المقالب رامز نيفر إند.
وأشارت ياسمين عز في حلقة اليوم من برنامجها كلام الناس عبر شاشة قناة mbc مصر، إلى أنها لاحظت بعض الأماكن تروج لمنتجات على أنها تفتح البشرة وتضع اسمها وصورتها، مؤكدة أن ما قيل بشأن أخذها لأبر لتفتيح بشرتها غير حقيقي وعار من الصحة.
وأكدت ياسمين أنها ستتحدث عن الموضوع مجددًا حتى تخلي ضميرها من أي ذنب، خاصة أن البعض الفتيات يقعن فريسة لهذه المنتجات، والتي يدعي البعض أنها تفتح البشرة بينما تضر بالصحة بشكل كبير.
وقالت ياسمين عز: من وقت ما مسحت إيدي بفوطة في برنامج رامز جلال وبيتقال أني باخد إبر وعاملة تفتيح، هو موضوع قديم ولكن من كتر ما بيتعاد زهقت منه، ولكن هرد علشان الموضوع ممكن يضر حد.
وأضافت ياسمين عز: فيه شيء اسمه مونتاج يعني ممكن اتسأل سؤال ويحطوا إجابة في حتة تانية، وفي حلقتي مع رامز خدوا سؤال البياض حطوه في التجميل والعكس، والفرعون يعمل اللي هو عاوزه طالما مش سيرة ذاتية عن قصة حياتي الملهمة.
وتابعت ياسمين عز: الناس ما صدقوا قالوا أني باخد إبر تفتيح وده كلام فاضي ومش حقيقي، علشان كده قررت آخد تان وأرجع لك سمراء حمراء ذهبية خمرية.
مفيش حاجة اسمها تفتيح بشرة
وتابعت ياسمين عز: الإحابة الأولى عن ردي بخصوص اتهامي بأني بيضت بشرتي، مفيش حاجة اسمها تفتيح بشرة، الحاجة الوحيدة اللي تفتحيها هو مخك مع فرعونك، والإجابة التانية أن البياض عمره ما كان مرتبط بالجمال وفيه سمر غاية في الجمال ومجتمعنا بيربط الجمال بالبياض وكأن البيضة ضمنت الجمال وفيه سمروات زي القمر وجذابات وحلوين وواحدة بيضة مفيهاش أي جاذبية.. هل لو أنا بقيت سمرا هبطل أتكلم عن الفرعون.
واستكملت: بقول الكلام ده النهارده لأني شفت استغلال من بعض الأماكن لمنتجات خطرة على أنها بتفتح ويحطوا صورتي واسمي، وده غلط ومضر بالصحة، ولو في حاجة بتفتح البشرة ما كانش حد غلب وكان كل الناس جابته وأنا بحذرك علشان أخلي ضميري وذمتي.
بياضي جينات وأي دكتور متخرج هيعرف ده
وأردفت: بياضي جينات ولو لسه دكتور متخرج هيعرف أن دي جينات وأنا عاوزة أكسر قاعدة أن البياض مرتبط بالجمال، وكمان إضاءة وإمكانيات زمان كانت سيئة.
