انتصار: عادل إمام أفنى كل حياته في المسرح.. ومسرحياته كانت بتقعد 10 سنين بتتعرض
حرصت الفنانة انتصار على حضور حفل افتتاح المهرجان القومي للمسرح المصري في دورته الـ 16، والتي تحمل اسم الزعيم عادل إمام، والذي أقيم مساء أمس السبت بدار الأوبرا المصرية.
انتصار: الزعيم عادل إمام أفنى حياته في المسرح
وقالت انتصار في تصريحات خاصة لـ القاهرة 24، إن إطلاق اسم الزعيم عادل إمام على الدورة الـ 16 من المهرجان القومي للمسرح المصري، تعتبر ميزة للدورة، متابعة: الزعيم كان شاطر أوي، وأفنى حياته كلها في المسرح، ومسرحياته كانت بتقعد 6 و7 و10 سنين تتعرض وتتشاف، ومفيش نجم قدر يقعد السنين دي كلها ومسرحياته تفضل في القمة وناجحة، فهو نجم المسرح ونجم العرب.
وأعربت انتصار عن سعادتها الكبيرة بتواجدها في دار الأوبرا المصرية لحضورها حفل افتتاح المهرجان القومي للمسرح المصري، إذ أوضحت: أنا مبسوطة جدا أني بحضر الدورة دي بقالي كام سنة محضرتهاش، تحمست جدا لأن محمد رياض كلمني بنفسه وقالي أرجوكي لازم تحضري، ومكلم كل الناس ووصل الدعوات لكله وقالنا معندكوش حاجة تمنعكم أنكم متحضروش.
وأضافت: حسيت أن لازم نيجي نتكاتف معه ونقف جنبه، والمسرح مسرحنا، والأوبرا بتاعتنا والفن بتاعنا والصحافة بتاعتنا والبرامج بتاعتنا والسوشيال ميديا بتاعتنا.. منجيش ليه يعني كأننا جايين البيت.
كما تحدثت انتصار عن قلة الأعمال المسرحية خلال السنوات الأخيرة، قائلة: السنوات الأخيرة كانت فيه شوية لخبطة وشوية دور عرض بيقفل ومسارح اتخدت ودا غلط مينفعش أنك تهد مسرح، والقانون بيقول لما تيجي تهد مسرح لازم تبني مكانه، مفيش حاجة اسمها أن الايجار خلص، لو هديت ابني مسرح تحت وفوق ابني العمارة اللي انت عايزها لكن لا مينفعش تهد المسرح.
