عصام كاريكا يوضح سبب ابتعاده عن الغناء: بعض الفنانين بيسرقوا ألحاني عشان يعيشوا
كشف الفنان عصام كاريكا، سبب ابتعاده عن الغناء لأكثر من عامين، مؤكدًا أنه يعمل حاليًا في التلحين، وأن هناك العديد من الفنانين سرقوا ألحانه.
وقال عصام كاريكا لـ القاهرة 24: ابتعدت الفترة الماضية عن الغناء لأني مركز في التلحين، ومعنديش مشكلة حد يسرق ألحاني وبسيب اللي يسرق يسرق؛ لأني في النهاية أنا اللي ببدع وكمان أنا فنان ميصحش أرد على فنان زيي وأعمل مشكلة معاه، واللي بيسرق بيكون فاقد للإبداع وبسيبه يسرق عشان يعيش.
وسبق وأثار عصام كاريكا جدلًا واسعًا على مواقع التواصل الاجتماعي بتصريحاته الأخيرة عن تلحينه العديد من الأغاني للممثلين، حيث قال في لقاء تلفزيوني سابق: فيه ممثلين صوتهم مكنش كويس ومع ذلك خليتهم يقدموا أغاني من ألحاني وعجبت الجمهور ونجحت لأن اللحن الحلو ممكن يغطي على الصوت وأنا شغلتي أطلع الأغنية في النهاية حلوة.
وأضاف عصام كاريكا: أنا تعبت مع ممثلين كتير وبعد ما الأغنية بتنجح وبتنجح أفلام كمان بيطلعوا ينكروا في اللقاءات إني لحنت الأغنية وسبب في النجاح وبعد كدا مش بتعاون معاهم تاني لأن المفروض النجاح بتاع ربنا وبعده الراجل اللي تعب في العمل.
أبرز ألحان عصام كاريكا
ويذكر أن عصام كاريكا لحن عدد كبير من الأغاني الشهيرة التي عرضت في العديد من الأفلام، من بينها أغنية يا أنا يا خالتي للفنان محمد هنيدي ودنيا سمير غانم، بجانب أغنية ياللي نسيت الغرام للفنان محمد سعد من فيلم بوحة.
