راغب علامة لـ التاسعة: أحلى الأوقات في حياتي قضتها في مصر.. وسعيد بمشاركتي في مهرجان العلمين
أعرب الفنان اللبناني راغب علامة عن سعادته الشديدة لإحيائه حفلًا جماهيريًا رفقة الفنانة نانسي عجرم ضمن فعاليات مهرجان العلمين الجديدة 2023.
وقال الفنان راغب علامة، خلال لقائه مع الإعلامية هدير أبو زيد في برنامج التاسعة المذاع على القناة الأولى: أحلى أوقات قضتها في حياتي بمصر، واتربيت وعشت في مصر وقت طويل، وأحلى أوقات في حياتي هنا، والمصريين أدوني أحلى ذكريات في حياتي، والانطلاقة من هنا، وسعيد بمشاركتي بالعلمين.
وتابع الفنان راغب علامة حديثه عن مشاركة الفنانة نانسي عجرم في حفل العلمين قائلا: معايا الفنانة اللي بحبها نانسي عجرم، ومتشوق للجمهور، والناس بتحب تشوف الفنانين اللي بيحبوهم، وأنا ونانسي بنشبه بعض في الحفلات والجمهور بيبقى حلو وإيجابي، والمهرجان ينضم لمجموعة الذكريات الكبيرة، عندي في قلبي ووجداني إن المهرجان هيبقى له ذكريات كبيرة.
وعن الأغاني التي سيؤديها في الحفل، قال راغب علامة: هغني كل الأغاني اللي ناس بتحبها، وأهم حاجة عملتها في حياتي إن شريط الأغاني عايش مع الناس، والحاجات اللي عملتها في التسعينات خالدة مع الجمهور، وأنا بحس بالجمهور بالأغاني، ويشعر بالجمهور كتير، وعلشان كده دايمًا الحفلة بتخلي الناس فرحانة.
راغب علامة: لازم أتجدد مع الجيل الجديد
واختتم راغب علامة: لازم إحنا كفنانين نكون متجددين، وأغانينا تبقى لسه عايشة، الشغف وحب الناس سبب استمراري، وبقعد في الاستوديو بشتغل بتخيل الناس هتبقى عاملة إزاي مع الأغاني، ودايمًا بدور على الحاجات المتميزة، ولازم أتجدد مع الجيل الجديد، وأنا مش من الفنانين اللي عايز تجدد، وأنا بسمع معظم الحاجات اللي بتنزل.
