محمد فاروق شيبة: قدمت فيلم لـ السبكي عام 2014.. وفكرته اتسرقت في مسلسل برمضان 2023
كشف الفنان محمد فاروق والشهير بـ شيبة، تفاصيل أزمته مع المنتج محمد السبكي، موضحًا أنه قدم له عملا سينمائيا عام 2014، وتفاجأ بسرقة فكرته في أحد مسلسلات الموسم الرمضاني 2023.
وكتب محمد فاروق منشورًا عبر حسابه الشخصي بموقع فيسبوك، كشف خلاله تفاصيل أزمته، قائلًا: انتهى الصمت واللي ليا عنده حاجة هاخدها، واحد من تلاميذي بيعيط على إفيه اتسرق منه، في سنة 2014 اترشحت لفيلم إنتاج محمد السبكي، وكنت ساعتها بصور فيلم وش سجون، لما قرأت الورق معجبنيش الدور لأني في وش سجون عامل دور كبير وبطولة.
وتابع: روحت تاني يوم وتحت باطي 50 مشهد من فيلم أنا كاتبه من سنة 2010، وماكنتش لسه خلصت باقي الفيلم، قولت لمحمد السبكي إني مش هشتغل الفيلم، وقولتله خد 50 مشهد أهم أحسن من المكتوب، والشاهد على الحدث جورج رمسيس، وخدت بعضي ومشيت.
وأضاف: بعد فترة تم الإعلان على جائزة نجيب ساويرس 2019، قعدت اشتغلت عليه وخلصته وقدمت في المسابقة، ومن أسبوع بتفرج على مسلسل اتعرض إنتاج 2023 رمضان الماضي، لقيت الفيلم بتاعي مسروق منه الفكرة الأساسية بالحرف ومشاهد بالمللي والحرف.
واختتم محمد فاروق علي، حديثه، موجهًا رسالة شديدة اللهجة لأحد الكُتاب: الأستاذ السيناريست الكبير المحترم، استعد هنتقابل قريب في ساحة المحاكم، السنة دي أنا مقدم فيلم، يا رب تسرقوه كمان علشان شكلي هاكل عيش على كل اللي حط عليا.
