البلوجر نوران طارق بعد الهجوم عليها بسبب ارتداءها الحجاب والبوركيني: محدش ليه دعوة
ظهرت البلوجر نوران طارق في فيديو عبر حسابها الشخصي بـ تيك توك، ترد فيه على الانتقادات التي تعرضت لها خلال الفترة الأخيرة بعد ظهور جزء من رقبتها وارتداء البوركيني.
البلوجر نوران طارق ترد على الانتقادات
وقالت البلوجر نوران خلال فيديو نشرته على حسابها الشخصي على تيك توك: الدنيا كلها قامت بعد ما ظهرت حتة من رقبتي، ولبست بوركيني، وتلقيت عددا كبيرا من الرسائل المسيئة، والتي كان أغلبها يتساءل: هتقلعي الحجاب امتى؟..احنا عارفين إنك هتقلعيه ولابساه علشان التريند.
وأضافت: استقبلت عددا كبيرا من هذه الاتهامات، وكنت أتجاهلها، وبقول جزء من اختبار ربنا ليا، وبعملها فيلتر، علشان لو في واحدة بتفكر تلبس الحجاب ودخلت شافت الكومنت، هتترعب تلبسه.
وأوضحت: بقالي 7 سنين على السوشيال ميديا، منهم 6 بشعري، الفترة اللي كنت فيها بشعري، عمري ما جاتلي كمية التعليقات السلبية اللي بشوفها دلوقتي، واللي ما بعرفش أنا قبل الحجاب قعدت 3 سنين أجاهد نفسي أخد الخطوة ديه، ما كنتش عليا بالساهل، أنا كنت من كتر ما أنا حابة اتحجب ومش عارفة، كنت بنام وبحلم إني متحجبة والحجاب يخنقني.
وتابعت: بعد الحجاب زاد الهجوم عليا من ناحيتين، جانب بيقول إن الحجاب رجعية وتخلف، وكلام مش حابه أتكلم فيه، والناحية التانية اللي بتقول حرام على كل حاجة وبيكفرك وأنتي قاعدة، وناس ولا تعرفني ولا تعرف حياتي الشخصية علشان أنا مش بشاركها معاكم.
وتابعت: في ناس كتير بتاخد جزء صغير من الدين وتطبقه، وتقول أنا بنصحها، وهي لا تعلم شروط النصيحة، ناس كتير بتدعي التدين والله أعلم ما بينهم وبين ربنا بيعملوا ايه.. الناس مش قادرة تقتنع إن كل واحد ليه الرحلة بتاعته، أنا مش طالعة أتكلم علشان مدايقة ولا أبرر علاقتي بربنا مع حد، محدش ليه دعوة، أنا طالعة أوجه كلامي للناس اللي بتنصح الناس بقلة أدب، لو أنتِ فاكرة إنك كده بتنصحي بطريقة ديه تبقي غلطانة، أنتِ بتصعبِ عليها الأمر أكتر.
