نفسي أتعالج.. عمرو محمد علي الشهير بشقشق: مش قادر أتكلم وحالتي الصحية في تدهور
كشف الفنان عمرو محمد علي تفاصيل حالته الصحية بعد تعرضه لوعكة صحية خلال الأيام القليلة الماضية، موضحًا أنه يعاني من صعوبة في الكلام خلال الوقت الحالي.
وقال عمرو محمد علي، في تصريحاته لـ القاهرة 24: الحمد لله رب العالمين على كل شيء ولكن الحالة في تدهور، والهجمات اللي بتيجي في المرض ده كتير، أنا كنت في مستشفى زايد التخصصي، ولكن إني صعب إني أتكلم، وتدهور الحالة للدرجة دي دي حاجة من عند ربنا.
وأضاف: فنانين كتير كلموني والدكتور أشرف زكي وناس من النقابة كلموني، ونفسي ربنا سبحانه وتعالى يعفو عني ويشفيني، أنا راضي بكل اللي ربنا يكتبه عليا، والجمهور كمان وحشني وإن شاء ربنا راجع تاني بعد ما ربنا يعفو عني، والفن مهنتي وشغلتي من وأنا صغير، وأول أجر أخدته جبت بيه حاجة حلوة.
شقيق عمرو محمد علي: أخويا عنده خلل في الجهاز المناعي
كما تحدث شقيقه عن تفاصيل حالة عمرو محمد علي الصحية، قائلًا: حالة عمرو الصحية مش تمام ولكن من بعد الجرعات اللي أخدها الأيام اللي فاتت بدأ يتحسن، وإحنا جايين إمبارح من المستشفى مكملناش 100 متر، وجاتله هجمة شديدة جدًا، والحالة بقالها فترة كبيرة من سيء لـ أسوأ، وأول مرة يجيله هجمة بالقوة دي وكان جسه كله لوح خشب ومكنش قادر يرفع ذراعه، واللي فهمناه إن عنده خلل مناعي في الجسم وجابله الـ MS، وعمله شوية حاجات جلدية في جسمه وأثر على طريقة كلامه وتفكيره.
وأضاف: هتكون فيه متابعة مع الدكاترة بـ استمرار، ولكن الحالة بعد ما أخذ الجرعات مبقاش في داعي إنه يكون موجود في المستشفى، ولكن العلاج الطبيعي لازم يروح له المستشفى، وهياخد جرعة كمان بعد 3 شهور، ولكن حالته لا تستعدي إقامته في المستشفى، والهجمات اللي بتجيله مش متوقعة ومفيش ليها ميعاد، وممكن لاقدر الله تجيله وهو نايم.
