أول تعليق لصاحبة تريند مندوب التوصيل: مش من حق أي حد أنه يعمل تريند على حساب أخلاق وسمعة الناس
اشتعلت مواقع التواصل الاجتماعي منذ صباح اليوم، بتريند مندوب التوصيل، الذي علق على الطلب كان يوصله لإحدى العميلات، ويثير حالة من الجدل بين رواد السوشيال ميديا، لترد صاحبة البوست بعد حذفها البوست المتداول.
أول تعليق لصاحبة تريند مندوب التوصيل
وردت رانية سنوسي على ما تداوله رواد مواقع التواصل الاجتماعي في بوست على صفحتها الشخصية، قائلة: ردًّا على اللي حصل بسبب بوست المندوب، وإغلاقًا لأي حديث وكلام مالوش أي لازمة، كل اللي عارف رانية سنوسي عارف أدّ إيه هيّ مالهاش في القيل والقال، وعارفين كويس إني أبعد الناس عن التشدّق بالالتزام والتدين أو محاسبة الناس، وإني أكتر حد بيحب الخير للناس جميعا دون تمييز.
وعن سبب نشرها البوست قالت: بالنسبة للبوست الخاص بالمندوب فأنا كان هدفي أعمل خير، بس هيّ الدنيا وطبيعتها، وقدر الله وما شاء فعل، وطبيعي يكون فيها ابتلاءات تختبرنا، أنا كنت موضحة في البوست القديم إن المنتج اللي اشتريته كان حاجة مش خاصة، بدليل إنه ممكن يتلبس خارج البيت، لكن الناس طبيعتها بتحب تاخد كلام وتسيب كلام عشان التريند وبس، وبالنسبالي موضوع التريند ده بشوفه فقاعة بتطلع تطلع وفي الآخر تنزل على مفيش.
وتابعت: فبالنسبالي أنا بفضل الله عارفة أنا إيه ومين، وعارفة أخلاقي كويس بفضل الله، وكدا كدا كلام الناس لا بيودّي ولا بيجيب، أنا عمري ما أسأت لحد أبدا مهما كانت درجة اختلافه معايا دينيا أو عقائديا أو حتى ثقافيا أو أي حاجة، طول عمري لما بختلف مع حد بختلف باحترام وتقدير.
وأردفت: كان نفسي جدًّا لمّا تختلفوا معايا في الرأي كنتوا اختلفوا بأدب، مش بالطريقة دي، لأني أنضف وأشرف وأرقى من كل الكلام اللي اتقال، ولأني زوجة راجل محترم وراقي، ولأني قبل كل دا أمّ محترمة ومثال وقدوة لناس كتير، ومش من حق أي حد أنه يعمل تريند على حساب أخلاق وسمعة حد.
وعن المندوب قالت: إنه في قمة الاحترام والأمانة والذوق.. ده غير أنه في عمر أولادي أصلًا، والاوردر كان فستان عادي والشنطة كانت مفتوحة، لأن اللي باعتة الاوردر مش سيلز ده فستانها الشخصي وهي كانت عارضاه للبيع.
