محمد أبو داود: عملت مشوار كبير بشرف واجتهاد.. وخايف مرجعش في الإخراج زي ما كنت

تحدث الفنان محمد أبو داود، على العديد من الموضوعات المختلفة بحياته المهنية والشخصية، وذلك خلال حفل توقيع كتابه في دار الأوبرا.

وقال محمد أبو داود خلال الندوة: من وأنا صغير كنت عايز أطلع ممثل، وكان كل همي أني أدخل معهد التمثيل، وروحت اسأل بياخدوا من مجموع كام، عرفت أن المعهد وقتها بياخد من 55%.

وتابع محمد أبو داود، راويًا ذكريات من بداياته في عالم التمثيل: كنت مرشح لبطولة مسلسل من تأليف صالح مرسي، واتشالت من البطولة لأسباب مش عايز أتكلم عنها، وبقيت أشتغل مساعد إخراج، لحد سنة 1998، وياسر صادق كان مقرب من المخرج حسام الدين مصطفى، وكلمني قالي إن حسام عايز يشوفني، وهو كان يعشق الممثل ويخاف عليه، فياسر صادق أحد الأسباب اللي رجعني للتمثيل تاني.

وأكد محمد أبو داود، على أنه اجتهد كثيرًا طوال مشواره الفني، وأضاف: أنا عملت مشوار كبير، حتى لو أثمرت قليل، ولكن بشرف واجتهاد، وأشكر ربنا لأنه ساعدني، وأنا ورياض الخولي كنا بنقول أننا بنشتغل بقدرة ربنا.

محمد أبو داود: خايف مرجعش زي ما كنت في الإخراج

واختتم محمد أبو داود حديثه، كاشفًا سبب ابتعاده عن مجال الإخراج، وقال: توقفت عن الإخراج غصب عني، وعادل إمام كلمني سنة 2000 وفضلنا نعرض مسرحية بودي جارد لحد 2010، وبعد ما خلصت، حصل اللي حصل في 25 يناير، والمسرح توقف في 2012، ولكن أنا اللي خايف ومتردد أني أرجع تاني للإخراج، لأني خايف مرجعش زي ما كنت.