محمد رياض يكشف سبب عدم تكريم عبلة كامل والإقبال الكبير على عروض المهرجان القومي للمسرح
تحدث الفنان محمد رياض، رئيس المهرجان القومي للمسرح عن كواليس الدورة الـ 16 للمهرجان التي أقيمت مؤخرًا والتي حملت اسم الفنان عادل إمام، كاشفًا سبب عدم تكريم الفنانة عبلة كامل، إلى جانب حديثه عن سبب الإقبال الكبير من الجمهور على هذه الدورة.
سبب عدم تكريم عبلة كامل
وقال محمد رياض عن عدم تكريم عبلة كامل خلال استضافته في برنامج الستات تقديم مفيدة شيحة وسهير جودة: أنا عارف عبلة كامل كويس، مش بتحب الظهور بشكل عام واستحالة تظهر في برنامج أو تعمل انترفيو لأن هي دي طبيعتها، واقترحنا اسمها في الدورات اللي فاتت ولكن هي ليها وجهة نظر وبحترم وجهة نظرها، وما فكرتش فيها في الدورة دي ولا كلمناها لأني عارف أنها مش هتوافق لأن هي مش بتحب الظهور.
ونفى محمد رياض ما قاله المخرج أمير رمسيس مدير مهرجان القاهرة السينمائي في وقت سابق، بأن مهرجان المسرح طلب من عبلة كامل التكريم ولكنها رفضت، قائلًا: لم نكلمها من الأساس.
استشعرت المسؤولية لهذا السبب
وأكد محمد رياض أن أكثر شيء أسعده هو سعادة الجمهور والمسرحيين، قائلًا: انشغلت جدًا بالتحضير للدورة دي ويمكن ما كنتش بقعد في البيت، ولكني سعيد أن الناس مبسوطة، والمسرحيين محتاجين يتعمل ليهم مهرجان كبير، لأنهم أكتر ناس افنوا عمرهم كله للمسرح، ومش بياخدوا مقابل سواء شهرة أو فلوس، ويمكن حبهم للمسرح هو المقابل، فقلنا نعمل حاجة تليق بالناس دي لأنهم يستحقوا ده، وأكثر شيء جعلني استشعر المسؤولية أن ده مهرجان الدولة الرسمي فاستشعاري بالمسؤولية كان أكبر، وإحنا محتاجين المهرجانات الخاصة بنا تظهر قدام العالم كله أنها حاجة كبيرة، وأول حاجة استشعرتها هو أن شفت المهرجان كبير جدًا، ده أكبر مهرجان مسرحي في العالم كله، ومهرجان مصر وبتاريخنا المسرحي.
محمد رياض يتحدث عن جوائز المهرجان القومي للمسرح
كما تحدث محمد رياض عن انتقاد البعض لقيمة الجائزة الأولى في المهرجان والتي تحمل رقم 10 آلاف جنيه فقط كقيمة الجائزة الأولى، قائلًا: مش حقيقي، وأنا قلت مش هرد على حد ومش عاوز حد يشغلني لكن كل اللي اتكتب غير حقيقي، قيمة الجوائز عندنا مجمعة 550 ألف جنيه، ودي مسابقة استحدثناها جديدة اسمها مسابقة التأليف المسرحي للعمل الأول، أطلقنا عليها اسم الكاتب أبو العلا السلاموني، في الأول كانت من غير جوائز مالية اللي بيكسب بيطبع له المسرحية الخاصة به، ودي أكبر حاجة بالنسبة لحد جديد ويكون فيه وتوصية أنها تنتج وتظهر للنور، خاصة أننا كنا بنفتش على كتاب مسرحيين جداد من مصر كلها ووصلنا لـ 186 مسرحية وده كان عبء كبير على لجنة التحكيم، ومعالي الوزيرة قالت نعمل لهم حاجة رمزية بجانب الجائزة الأساسية، ولكن الجائزة الأساسية هي طباعة المسرحية بتاعتهم، إلى جانب مبلغ رمزي 10 آلاف للجائزة الأولى و7 للجائزة الثانية و5 للجائزة الثالثة.
سبب الإقبال الكبير من الجمهور على المهرجان القومي للمسرح
وكشف محمد رياض سبب الإقبال الكبير من الجمهور على المسرح، قائلًا: حصل حراك مسرحي، والسنة دي سهلنا على الناس وخلينا الحجز أونلاين اللي بييجي من بره القاهرة عارف أنه هيدخل وبيختار العرض اللي عاوز يدخله ومعظم الحضور شباب، والسنة دي كان فيه عروض مسرحية كتير وإنتاج حلو وكل المسارح بتاعة الدولة شغالة وعندها عروض وإقبال كبير جدا.
