التحقيقات فى قضية طبيب الساحل تكشف تفاصيل جديدة | خاص
قررت النيابة العامة إحالة المتهمين الثلاثة الطبيب أحمد شحتة، والمحامية إيمان وثالث، بتهمة قتل طبيب الساحل الدكتور أسامة صبور عمدا؛ لسرقة مبالغ مالية بحوزته، بعد دفنه حيًا داخل حفرة بعيادة المتهم الأول.
طبيب الساحل
وحصل القاهرة 24 على نص التحقيقات في قضية طبيب الساحل، وحوت الأوراق على اعترافات الطبيب أحمد شحتة في التحقيقات، وجاءت أقواله أمام جهات التحقيق كالتالي:
يوم 20 مايو 2023 جات في دماغي فكرة إني أخلي إيمان تستدرج أسامة صبور طبيب الساحل، لأي مكان مفيهوش حد عشان لما ييجي هيكون معاه الدولارات اللي تقدر بحوالي 5 آلاف دولار، والمبلغ اللي هو معتاد حمله، ولما يوصل هكون أنا وأحمد فرج مستنيينه، وأنا هخدره عشان ميعرفنيش، وكده كده أسامة ميعرفش أحمد فرج، وناخد منه الدولارات اللي معاه، وباسوورد الفيزا ونسحب بالفلوس، ونسيبه ونهرب والفكرة دي جات عشان مصلحة كويسة مفيهاش مشاكل، وأسامة مش هيعرف يوصلنا ومفيش حد هيتأذي.
وأضاف المتهم بقتل طبيب الساحل: وقلت لإيمان وأحمد على الفكرة اللي جاتلي، وأحمد قالي تمام وإحنا ممكن نجيبه على الشقة اللي أنا مأجرها، وقلت لإيمان تكلم الدكتور رائد بمعهد ناصر، وتقوله إن اسمها مارينا غطاس، عشان هو فعلا عمل عملية لوالدة مارينا السنة اللي فاتت، واتفقنا تكلمه في الوقت اللي أسامة يكون فيه نبطشية مع الدكتور رائد عشان الدكتور رائد مش بيطلع كشوفات برة، وأحمد فرج هيقابله على أساس إنه هو قريب إيمان، وهيوديه للشقة اللي فيها والدتها اللي هي الحالة، وأنا كان عندي دفتر روشتات فاضي بتاع واحد صاحبي دكتور نفسي كان مديهوني، وكتبت في روشته منهم على دواء مخدر، وخليت إيمان تصرفه من صيدلية الإسعاف.
وأردف: وفعلا إيمان كلمت دكتور رائد يوم 3 يونيو 2023 وقالتله إنها محتاجة كشف منزلي، والدكتور رائد إداها رقم دكتور أسامة صبور، واتفقت معاه إنه يجيلها تاني يوم في الشقة اللي مأجرها في أبو وافية، والكلام ده إيمان حكيتهولي، وكلمت واحد صاحبي جابلي دوا مخدر بيخلي الشخص متخدر لمدة نص ساعة، وأنا في العيادة جبت عصير وحطيت فيه المخدر، وفتت قرص عقار بيفقد الوعي بنسبة 40% لكده 18 ساعة، وحطيته في العصير وطلعنا على الشقة وفضلنا قاعدين شوية، وأنا كان معايا إليكتريتك كنت واخدة من العيادة عشان لو الأمور تطورت أستخدمه مع أسامة.
