مدحت صالح: بطلت الأقساط لما اتعذبت.. وكنت برفض النقطة ووافقت عشان أنتج ألبوم السهرة تحلى
حل الفنان مدحت صالح ضيفًا على الإعلامي محمود سعد في برنامج Sold Out المذاع على منصة Watch IT، وتحدث عن مشواره الفني وبداياته وطفولته.
وقال مدحت صالح: جبت سنة 79 عربية سيات أول ما طلعت، وكنت محتاج ضعفين المرتب عشان أدفع قسط العربية وكان أول وآخر قسط في حياتي، ولما اتعذبت بطلت الأقساط.
وأضاف: مكنتش بحب النقطة، بس عمر فتحي -الله يرحمه- أقنعني آخد النقطة، هو كان بياخد وأنا لا، وقالي احنا مش بنضرب الناس على إيدها ولا بنمد إيدينا في جيب حد، ولما قررت آخد النقطة كنت بشتغل عند الست شريفة فاضل في كازينو الليل، وكنت متفق إني مش هاخد كيت -نُقطة- بشتغل في نايت كلوب بس بطريقتي، وفي نفس الوقت مش بناخد مبلغ كبير تقريبًا كان 180 أو 185 جنيه في الليلة ولما طلبت أزود قالتلي مفيش ما أنت اللي عامل في نفسك كده أنت ممكن تبقى أغنى واحد فينا كلنا والناس بتحبك لو خدت الكيت.
مدحت صالح: أنا بغني مغمض عيني
وأوضح مدحت صالح: أنا بغني مغمض عيني لأني اتعودت على ده، وأنا بغني سمعت صوت حاجات بتنزل وصوت الفلوس، ومن هنا بدأت الحكاية، والنُقطة مش بياخدها المطرب كاملة، فيه تلت للمكان وتلت للأوركسترا وتلت للفنان، وبعد ما كنت بروح الصافي بتاعي 45 جنيه بقيت بروح 5 و6 آلاف جنيه في اليوم الفلوس بتدفي لما بتبقى بتعب.
وأردف مدحت صالح: نزلت شارع الهرم لمدة سنتين بس، غنيت في كازينو شاليمار وعند أمين بيه سامي، حوشت سنتين وبعدين ركبت عربية بيجو 503 ودفعت فلوسها كاش، الفلوس جات آخر 3 شهور في شارع الهرم، الدنيا كانت هتختلف لو كنت من الأول بقبل الكيت، وقبلته عشان عايز أجمع 16 ألف جنيه لإنتاج ألبوم السهرة تحلى، وأول دخل جالي من الألبوم نزلت دفعت مقدم لعربية مرسيدس.
