استشاري العظام بمعهد ناصر في تحقيقات قضية طبيب الساحل: أسامة متربي وابن ناس وكان بيسمع للمرضى |خاص
حددت محكمة الاستئناف بالقاهرة يوم 2 سبتمبر المقبل؛ لنظر أولى جلسات محاكمة المتهمين في قضية مقتل طبيب الساحل أمام جنايات الدائرة الأولى برئاسة المستشار عبد الغفار جاد الله.
تحقيقات قضية مقتل طبيب الساحل
وأمرت النيابة العامة بإحالة أحمد شحتة طبيب بشري، وامرأة تربطه بها علاقة زواج عرفي تدعى إيمان، وأحمد فرج مشرف إداري يعمل بعيادته، إلى محكمة الجنايات بعدما انتهت تحقيقاتها معهم إلى ثبوت اتهامهم بجناية قتل طبيب بشري عمدا مع سبق الإصرار المقترنة بجنايات خطفه بالتحايل، وسرقته بالإكراه، واحتجازه دون وجه حق، وتعذيبه بدنيا قبل القتل؛ لرغبتهم في الاستيلاء على أمواله، بعدما أوعز إليهم الطبيب المتهم بذلك لمعرفته بالمجني عليه وعلمه بثرائه.
وجاءت أقوال استشاري العظام بمعهد ناصر في التحقيقات كالتالي: اسمي رائد عبد المنعم 42 سنة، اللي أعرفه عن أسامة صبور طبيب الساحل، إنه من محافظة الشرقية وحديث التخرج، وكان من أصغر النواب الموجودين في الفريق الطبي بتاعي، بالإضافة إلى إنه كان دمث الخلق ومحبوب من كل زمايله وكان باين عليه إنه من أصل طيب ومتربي كويس، وظروفه الاجتماعية مستريحة، ومن ناحية تانية كان أسامة من النواب المجتهدين ومقبل دايما على الشغل لدرجة إن المرضى كانت بتحبه جدًا، عشان كان بيسمعهم وبيعاملهم معاملة كويسة وسمعت بعد وفاته إنه كان بيشتغل في تبديل العملة وإنه كان صاحب شحتة، وبالنسبة لموضوع تبديل العملة عرفته من زمايله في المستشفى، وعلاقة عمل لأن أحمد شحته المتهم الأول في واقعة طبيب الساحل، طبيب مقيم بجراحة العظام في معهد ناصر بالإضافة إلى إنه اشتغل معايا في شهر أكتوبر 2022، لمدة شهر في الفريق الطبي بتاعي وساب الفريق عشان على ما أتذكر أنه كان عنده امتحانات ماجستير ولما رجع راح على مجموعة أخرى، واللي أعرفه عنه إنه من الشرقية وإنه لسه واخد الماجستير قريب من جامعة الأزهر وسمعت بعد وفاة أسامة صبور، إن أحمد شحته ظروفه الاجتماعية على قده وإنه هو وأسامة صبور، كانوا عارفين بعض كويس لأنهم من نفس المحافظة.
س: ما طبيعة علاقتهما؟
ج: بلديات بعض وأصحاب جدًا.
س: ما آخر زمان ومكان جمعك بالمتهم أحمد شحته؟
ج: من حوالى شهر ونص في عمليات قسم العظام بمعهد ناصر.
س: كيف جرى لقاؤكما وقتئذ؟
ج: شافني وأنا في العمليات وسلم عليا فسألته قولتله إذا كان ناوي يرجع يشتغل في اللستة بتاعتى تاني، فاعتذر وقالى إنه مشغول في مجاميع تانية مع دكاترة تانين.
س: وعلام انتهى؟
ج: هو مجرد السلام ما حصل ما بينا والكلمتين اللى قولتهمله وبعدين اللقاء انتهى.
س: ما آخر زمان ومكان جمعك بالمجنى عليه أسامة صبور طبيب الساحل؟
ج: يوم السبت الموافق 3 يونيو 2023، وفى اليوم ده الساعة عدت 12 صباحا ودخلنا في اليوم التالي الموافق 4 يونيو وكانت الساعة واحدة صباحا داخل عمليات العظام بمعهد ناصر.
س: من رافقكما؟
ج: دكتور أحمد ودكتور عبد الله، ودكتور حسن، ودكتور مايكل، ودكتور محمد.
قضية مقتل طبيب الساحل
س: ما الغرض من اللقاء؟
ج: هو كان شغال معايا في لستة العمليات مع باقي زمايله النواب لأن يوم السبت ده اليوم المحدد لحضورى لمعهد ناصر عشان أباشر شغلى في العمليات مع طقم النواب اللى معايا.
س: كيف جرى لقاؤكما وقتئذ؟
ج: قابلته في معهد ناصر الساعة 11 صباحا وابتدينا لستت العمليات وفضلنا شغالين، وجالي تليفون على الساعة 8 بليل من واحدة ست عرفتنى على نفسها وإن والدتها كانت عاملة عملية شرائح ومسامير عندي، وإن والدتها وقعت على رجليها ومحتاجة حد يبص عليها في البيت، لأن سنها كبير ووزنها تقيل ومش هتقدر تتنقل المعهد وعايزة كشف منزلي فرديت عليها وقولتلها أنا مش بطلع كشوفات منزلية، بس هشوفلها حد من النواب لو فاضي يطلع وقولتلها إن عامة لستة العمليات النهاردة طويلة وابقي اتصلي بيا على آخر اليوم عشان اقولك على النايب اللي هيطلع، وفي آخر اليوم فعلا خلصت عمليات على الساعة واحدة صباحا، والست دي رجعت اتصلت بيا فرديت عليها وكان جنبى في الوقت ده الطبيب المقيم أسامة وقولتلها خدى الدكتور أسامة معاكى على التليفون، عشان هو اللي متاح يجيلك البيت وبعدها الدكتور أسامة كلمها من خلال تليفوني وتواصل معاها عشان يرتب الزيارة المنزلية لوالدتها في مساء اليوم التالى لحد ما خلصنا متأخر أوي وكنا دخلنا في اليوم التالي.
