الفنان عادل شعبان: انهارت بسبب وفاة بنتي.. وحصلت على عضوية نقابة الممثلين
تحدث الفنان عادل شعبان عن أصعب المواقف التي مر بها في حياته والصعوبات التي واجهته خلال مسيرته الفنية، ومنها حصوله على عضوية نقابة المهن التمثيلية.
وقال عادل شعبان خلال حواره مع القاهرة 24: كان عندي بنت الله يرحمها عندها 5 سنوات فقدتها، وعملتلي انهيار في كل مناحي الحياة عندي أنا وزوجتي، فمكنتش قادر أكمل في إسكندرية فقررت إني أغير المكان اللي أنا فيه وابدأ بداية جديدة، يا أما أخسر كل شيء.
وأضاف عادل: والظروف دي أجبرتني إني أرجع القاهرة ومن هنا بدأت أولى الخطوات إني اتحول من الهاوي للمحترف خصوصًا إن أصدقائي اللي كانوا معايا في إسكندرية أصبحوا نجوم زي أحمد أدم، أحمد رزق، محمد شرف، رضا إدريس، ومجموعة كبيرة أخرى.
وأكمل عادل شعبان: واجهتني أول مشكلة إني مش عضو نقابة في المهن التمثيلية وفي الوقت ده كانت النقابة قوية وكان ليها تأثير على جهات الإنتاج فكان في نوع من التفاهم بين النقابة على أن محدش يشتغل غير لما يكون عضو نقابة أو يأخد تصريح من النقابة هنا بدأت إني أعمل مجهود مضاعف علشان أنقل المهارة والموهبة بتاعي من الهاوي للاحتراف.
واستكمل عادل شعبان حديثه، قائلًا: كان فيه صعوبة في البداية إني بدور على العمل وبعدين أخد التصريح، وفضلت على المنوال ده كتير بس الحقيقة وجود وظيفة بالنسبالي كان بيعملي نوع من تأمين الحياة ومكنتش مضطر إني أقبل أي حاجة من الفُتات اللي معروضة عليا، فكنت حريص من الأول إني معملش شيء يتحسب عليا والحمد لله كل عمل كان بيوصلني للعمل اللي بعده لحد ما حصلت على عضوية النقابة سنة 2013 بعد نحو 13 سنة وكان مشوار طويل جدا.
