اعتبرها فسحة.. متهم بسرقة فيلا محمد صلاح يروي كواليس التخطيط لارتكاب الجريمة | تحقيقات
روى أحد المتهمين بسرقة فيلا محمد صلاح اللاعب « الدولي نجم منتخب مصر، والمحترف حاليا في نادي ليفربول الإنجليزي بالتجمع الأول » أمام جهات التحقيق كواليس وتفاصيل التخطيط مع باقي المتهمين لارتكاب الجريمة، وذلك في القضية 4262 لسنة 2023 جنح التجمع الأول رقم الحصر 524 سنة الحصر 2023.
سرقة فيلا محمد صلاح
قال أحد المتهمين بسرقة فيلا محمد صلاح في التحقيقات التي حصل عليها القاهرة 24: في آخر شهر فبراير 2023 ومش فاكر يوم إيه بالظبط تلقيت اتصال من المتهم الأخر عادل بيقولي تعالة نقعد مع مصطفى عشان عاوزنا في حوار تعالى نشوفه، وبالفعل قابلت عادل الأول عند بيته اللي موجود في الضبعة في الإسماعيلية.
وأكمل أحد المتهمين: خدته بالتوكتوك بتاعي وروحنا منطقة أبو آدم قابلنا مصطفى وروحنا قعدنا في الشارع، ولقيت مصطفى بيقول لعادل أنا عايزك في حوار هيعدينا، وعادل قاله حوار إيه قاله أنا كنت شغال في القاهرة الجديدة، وأنا عارف الدنيا هناك، وأنا اشتغلت هناك سنتين والناس كلها اللي هناك تقيلة ومعاها فلوس، وما بيدوروش على الفلوس اللي بتضيع منهم، فعادل قاله أنت عارف الدنيا هناك قاله آه، أنا كنت شغال هناك سنتين وعارف البيوت والناس والمداخل والمخارج.
وأضاف: عادل قاله ماشي بس الحوار ده هيصرف كام، فمصطفى قال لعادل مش عارف احنا هنركب من الإسماعيلية وننزل المرج، ومن هناك هناخد تاكسي للقاهرة الجديدة، ومن هناك بيدخلك جوا المدينة فعادل قاله اكيد قاله أيوة أكيد أنا كنت شغال هناك وعارف كل حاجة، فعادل قالي أنت إيه رأيك في الكلام ده هييجي معانا، ولا هتفضل شغال بالتوكتوك زي مانت ويطلعلك مصلحة تغير التوكتوك اللي ما بيطلعلكش منه حاجة وتجيبلك ميكروباص.
وأردف المتهم بسرقة فيلا اللاعب الدولي محمد صلاح: أنا اللي معايا ممشيني بالعافية وأهلي مش حمل يجروا ورايا في مشاكل فقالي ماشي لو على الفلوس سهلة ندفعلك فأنا قولتله لا مش على الفلوس وفضلوا الاثنين يزنوا عليا إني أدخل معاهم، ويقولولي مالكش دعوة بالفلوس واعتبرها فسحة فأنا قولتلهم لا أنا مش معاكم، فراحوا الاثنين ردوا عليا وقالولي ماتجيبش سيرة لحد إننا اتكلمنا معاك في الحوار ده، ومصطفى اتكلم مع عادل قاله انت معاك رقم محمد. غ وهو محمد. غ ساعات يبقى معاه ميكروباص أو عربية وناخده معانا يوصلنا وتفهمه ونقسم احنا الثلاثة.
تحقيقات سرقة فيلا محمد صلاح
وأضاف المتهم: اتصلوا بمحمد. غ وحكوله على إنهم عايزين يروحوا يسرقوا من القاهرة الجديدة، وهو رد عليهم وقالهم إنه ما بيطلعش بالعربية عشان فرحه قرب وبيشطب في الشقة بتاعته، وقفلوا مع محمد. غ لما لقوه مش موافق يبقى معاهم وفضلوا يتكلموا مع بعض وعادل يقول لمصطفى انت هتسوحنا ومصطفى قال لعادل انت قلقان من ايه، وعادل قاله على الفلوس أنا اللي معايا مش هيكمل أنا ماعيش غير 100 جنيه هيودوني ومصطفى رد عليه قاله ماتشغلش دماغك بحاجة أنا كدة كدة هبيع التليفون هنروح بيه ولو لعبت معانا هبقى أجيب تليفون تاني ولو ما قضيتش اعتبرها فسحة وجينا.
