هاني شنودة: بعت عربيتي وأؤمن بأن الفشل يؤدي للنجاح.. والذكاء الاصطناعي لن يؤثر في مصر
كشف الموسيقار هاني شنودة رأيه في إحياء الأصوات بالذكاء الاصطناعي واستخدامه في الغناء، بجانب الحديث عن حصوله على جائزة الدولة التقديرية.
وقال هاني شنودة في حوار مفتوح في ساقية الصاوي مع الجمهور على هامش حفل توقيع كتاب محمد صبحي: الذكاء الاصطناعي في مصر مش هيبوظ حاجة ولن يؤثر، هو فيه أحلى من إني أعمل لحن وأخلي عبد الحليم يغنيه؟ والذكاء الاصطناعي هيغزو العالم كله وهما خايفين إنه يقضي على البشر.
أما عن حصوله على جائزة الدولة التقديرية، أعرب هاني شنودة عن سعادته، قائلا: أنا في منتهى السعادة إني حصلت على جائزة الدولة التقديرية لأنها بالنسبة لي تكريم وتقدير من الدولة والشعب والهرم والنيل وكل حاجة في مصر وكأنهم بيقولوا ليا إحنا بنقدرك.
هاني شنودة: فيه شباب ميعرفونيش.. وأعمالي أهم مني
وأضاف هاني شنودة: يمكن في شباب كتير متعرفنيش بس يعرفوا أعمالي، وأعمالي أهم مني ودائما بقول للناس مين هاني شنودة؟ مش مهم أنا ولكن المهم العمل، والناس اللي بتقول إزاي السعودية تكرمني ومصر لا، بقول لهم إني صناعة مصرية وعادي أتكرم في أي دولة سواء السعودية أو كوالالمبور.
وتطرق هاني شنودة للحديث عن حبه للموسيقى وبداياته الفنية، قائلا: الأول أنا حبيت الموسيقى وكنت بسمع كل أنواعها ثم بقى عندي الشغف، وبعدين بقيت بهتم بكل حاجة ليها علاقة بالموسيقى، وبحلم إننا ننافس العالم كله.
واختتم هاني شنودة، حديثه، قائلا: أنا بعت عربيتي وشايف إن الغرور دا شيء قاتل وإن الفشل أول خطوة للنجاح، أنا كل المعلومات اللي خدتها من علم النفس حطيتها في الأغاني علشان الناس تسمع وتتعلم وتستفيد.
