طارق الشناوي عن تصريحات مادلين طبر: ينقصها اللياقة.. وتحمل اتهاما لأسرة عادل إمام
أعرب الناقد الفني طارق الشناوي عن استيائه الشديد بسبب تصريحات الفنانة مادلين طبر الأخيرة بشأن احتجاز الزعيم عادل إمام في بيته من قبل أسرته.
وقال طارق الشناوي في تصريحات خاصة لـ القاهرة 24: أنا بقول لا ندخل في النوايا، ولكن اللي أقدر أقوله إن الرأي اللي قالته مادلين ينقصه اللياقة، لإنه أولًا بتدخل في شيء شخصي، والكلمات بتوحي إن أسرة عادل إمام حابسينه في البيت، أو مانعينه من التواصل.
وأضاف طارق الشناوي: في الحقيقة اللي قالته تعقيب عليها ومليش دعوة إن هي تعمل تريند أو لا، ويحمل اتهام لأسرة عادل إمام بلا أي سند، والجزء الثاني إن عادل إمام في عيد ميلاده موجود ونزله صور، وأتكلم مع شريف عامر، ويظل الفنان هو اللي يملك مصير نفسه، وعادل من حقه يشتغل أو لا، من حقه يتكلم في التليفون أو لا، ودي مسألة منطقية، ومن حق رامي لو هي كلمته إن هو يرد أو ميرديش، وعدم رده ميدلش على أي إهانة، وحق الرد مشروع لأي إنسان.
طارق الشناوي: مادلين إعلامية قبل أن تكون ممثلة.. ويجب أن تدرك معاني كلامتها
واختتم طارق الشناوي: فكرة إن الناس تقتحم فيلا عادل إمام علشان تشوفه دي مسألة خانها التعبير فيها، هل ممكن الناس تقتحم بيت مادلين علشان تشوفها؟ والمفروض إن هي مش مجرد ممثلة هي إعلامية، والإعلامي بيدرك الإحساس بالكلمة وإيه اللي ممكن يؤدي المعنى الذي ربما هي لا تقصده.
