حزننا أكبر من فرحتنا بشفاء بابا.. أول تعليق من نجل عادل فايز صاحب معجزة الشفاء بكنيسة العذراء
كتب سامر جرجس نجل عادل فايز صاحب فيديو الشفاء من الشلل الرباعي بكنيسة السيدة العذراء مريم والبابا كيرلس بعزبة النخل منشورًا حول الحالة الصحية لوالدة وعن تداول مقطع الفيديو الخاص به.
وقال سامر في منشور له عبر صفحته الشخصية بموقع التواصل الاجتماعي فيسبوك: سلام لحضراتكم جميعا حابب أوضح كام نقطة لكل اللي هيشوف البوست دا إذا كان مسيحي أو مسلم، أولًا أنا اسمي سامر جرجس فايز ابن عادل فايز صاحب معجزة العذراء، مع العلم أنه في الحكومة جرجس والشهرة عادل.
وأضاف: أنا التزمت الصمت من ساعة ما ربنا أراد بهذا العمل ومنعت أني اتكلم مع أي جريدة أو مدخلات تلفونية أو أي حوار صحفي أو حتى أي فويس؛ لأن أنا شايف من وجهه نظرى إن كتر الكلام يفسد العمل الحقيقي وهو مجد اسم الله، ولأن الموضوع كان على مسمع ومرأى الجميع فمش محتاج اطلع واتكلم وناس كتير دعتني في كنائس عشان أقول اللي حصل، كان الرد أن مجد الله مع كل الناس مسلم ومسيحي لأن الله بيشتغل مع الجميع، مجد اسم الله موجود من قبل المعجزة وأي معجزة.. ورفضت طبعا.
وأكمل: وبابا لما طلع وسجل كان بارشاد من أب اعترافه.. ودلوقتي هو رافض عمل أي حوار مع أي حد، والموضوع بيشرف عليه نيافة الأنبا سيداروس أسقف عام كنائس عزبة النخل.
وواصل: لكن الموضوع هنا واللي عايز اتكلم في أنه أخد سكة تانية خالص في يوم وليلة لقينا نفسنا فوق أوى وناس خلتنا ملايكة وفي يوم وليله لقينا نفسنا تحت أوى من ناس خلتنا شياطين (ونحن ولا هذا ولا ذاك نحن أناس نعيش كباقى البشر) لينا وعلينا وبقى في ناس مؤيدة وناس معارضة ناس مع وناس ضد.
وتابع: وبقى في ناس بتدخل في أمور شخصية لمجرد إنها تقول رأيها وتعمل سبق صحفي على الموضوع وتبقى ليها رأي وصوت أذا كان مؤيد أو معارض والكل نسي إن في أسرة وعائلة متخده في جو غريب أوي لقينا نفسنا جواه ومش عارف أيه اللي بيحصل وصور شخصية وعائلية طلعت فجأة أنا نفسي مش عندي وحاجات غريبة جدا.
واستكمل: كل اللي أنا أعرفه أن الله نظر إلينا بعين الرحمة بعد تعب سنين كتير مش بس لبابا لالا دا لكل الأسرة وماما أكتر واحدة لأنها فعلا تعبت جدا جدا وشافت أيام مؤلمة اوووووى ومهما ما اتكلم مش هقدر أوصف هي تعبت أد إيه وبشهادة كل الناس اللي اتعاملوا مع بابا مسلمين قبل مسيحيين وشافوه قاعد على الكرسي سنين وآمن كمان أن الله ممكن يعمل حدث ومعجزات مش بس عشان الشفاء الجسدي دا عشان يرد كتير بسبب هذا العمل وهي دي المعجزة الحقيقية.. لأن الله يهتم أولا بشفاء الروح والنفس.
واستطرد: رسالة للجميع يعلم الله أن حزننا أكبر بكتير من فرحتنا بشفاء بابا وقولنا إن ربنا هيعوضنا كتير بالسنين اللي إحنا شوفناه.. لكن للأسف ضاعت فرحتنا وسط الزحمة والكلام الكتير رجاء محبة... كفايا كلام عايزين نشوف حياتنا وشغلنا وكفايا تليفونات وكفايا كلام على النت، رجاء أنا مش عايز تعليق من أي حد، حضرتك مؤيد خير وبركة الله هيتعمل معاك بحسب قلبك حضرتك معارض خير وبركة بردة والله هيتعامل معاك بحسب عقلك لكن افتكر أن في ناس عايزين يعيشوا فى هدوء الله يعمل في الجميع في كل وقت وكل عصر شكرا لحضراتكم جميعًا.
