ابنة البلوجر هبة السيد: ماما كانت خدامة في البيوت.. وقعدتني من المدرسة عشان تطلع النقص اللي عندها عليا
كشفت التحقيقات في قضية البلوجر هبة سيد صاحبة قناة أم زياد وهبة بمواقع التواصل الاجتماعي، أقوال ابنة المتهمة هبه السيد والتي تدعي حبيبة ح. ع، البالغة من العمر 15 عاما، أمام جهات التحقيق، حقد والدتها عليها قائلة: ماما قعدتنى من المدرسة عشان تطلع النقص اللي عندها فيا، عشان في سني كانت خدامة.
التحقيقات في قضية البلوجر هبة السيد
وينشر القاهرة 24 أقوال ابنة البلوجر هبة السيد بالتحقيقات في القضية التي حملت رقم 7944 لسنة 2023 مركز الخصوص، والمتهمة فيها البلوجر هبة سيد صاحبة قناة أم زياد وهبة، وابنها وزوجها.
وجاء نص التحقيقات كما يلي:
س: ما صلتك بالمتهمة هبة سيد إبراهيم أحمد؟
ج: دي تبقى مامتي.
س: وما هي طبيعة عمل سالفة الذكر؟
ج:هي بتشتغل يوتيوبر وهي مالكة محتوى على اليوتيوب وعلى الفيس بوك وتيك توك.
س: وما هي أسماء الحسابات المملوكة لسالفة الذكر على مواقع التواصل الاجتماعي؟
ج: هي ليها حساب تجاري على تطبيق الفيس بوك باسم هبة سيد وليها قناة على اليوتيوب اسمها قناة أم زياد وهبة.
س: ما ظروف نشأتك؟
ج: أنا بابا شغال جزمجي في ورشة في باب الشعرية وماما ربة منزل وأخواتي هما محمد وزیاد وبعد كده هبة وبعد كده ماما خلفت أيلين في ۲۰۲۰ وقبل موضوع اليوتيوب ده كانت حياتنا طبيعية عادي زي أي بيت بس كانت حالتنا - المادية على قدها أوي، وبابا كان بيروح الشغل كل يوم وماما قاعده معانا، وساعتها بابا كان الراتب بتاعه يدوب معيشنا ومكنش بيسمح لنا أننا نجيب أي حاجة جديدة وماما كانت بتحاول تساعده أحيانا وكانت بتحاول تخلي حياتنا أحسن ومهتمة بينا أوي في دراستنا ولبسنا وكانت دايما مهتمة بيا، بس ماما كانت عصبية أوي وكانت بتتخانق معانا على اتفه سبب، وإحنا كنا زي أي بيت طبيعي، ماما بتخش جمعيات كتير عشان تحسن من مستوانا الاجتماعي ومكنش معانا أي موبايلات ولا أي حاجة خالص بس بعد موضوع السوشيال ميديا ماما هي اللي بقت بتصرف علينا لأننا كنا ممكن في الشهر الواحد ناخد من 7 لـ 10 آلاف جنيه.
س: وما مؤهلاتك العلمية؟
ج: أنا سابية الدراسة من 3 سنين وكنت ساعتها مخلصة أولى إعدادي.
س: وما سبب اهمالك لدراستك؟
ج: ماما هي السبب، قعدتني من الدراسة.
س: ولما؟
ج: ماما قعدتني معاها في البيت عشان أساعدها وانضف مطرحي ومطرح أخوتي.
س: وما تعليلك لذلك؟
ج: كانت بتطلع عقدة النقص اللي عندها عشان وهي في سني كانت بتشتغل خدامة في البيوت.
اعترافات ابنة البلوجر هبة سيد
س: وما مدى خبرتك باستخدام الحاسب الآلي والإنترنت؟
ج: أنا مليش في شغل ماما ومحمد ده بس كان أخري اتفرج على كرتون أو ألعاب ومحمد كان هو اللي بيجبهالنا على فلاشة.
س: وما بادرة إنشاء شقيقك محمد حمدي عبد المجيد حسابات والدتك؟
ج: محمد من صغره وهو ليه في الانترنت واليوتيوب وكده وهو اللي اقترح على ماما فكرة أننا نعمل فيديوهات زي وفاء " و" أحمد حسن وزينب" وقالنا إن الموضوع ده بيجيب فلوس حلوة ولما كنا بنشوفهم كنا بنبقى عايزين نبقى زيهم. ومعانا فلوس كتير.
س: ولما اختار شقيقك محمد حمدي عبد المجيد والدتك لإنشاء تلك الحسابات لها؟
ج: عشان ماما كانت قريبة لينا أوي ومعظم الوقت قاعدة معانا.
س وما أسماء تلك الحسابات؟
ج: كلهم كانوا بنفس الاسم باسم أم هبة وزياد واسم اليوزر كان (هبة سيد Heba Sayd)، وكان في صفحة ثانية باسم يوميات أم زياد وهبة ۲ ودي جوزها اللي اسمه حسن هو اللي عملها لأن ماما متعرفش تنشأ صفحة ومتعرفش تعمل المونتاج ده لأن حسن بيعمل شغل أي كلام على عكس محمد كان شاطر أوي في الموضوع ده.
س: ولما قامت بإنشاء تلك القناة الأخرى؟
ج: هي فتحتها عشان جوزها حرضها على كده عشان يقدروا يكملوا حياتهم عادي من غير ما أبقي موجودة فيها ولا محمد كمان كان عايز يطفشنا عشان ياخد المكسب كله لنفسه هو وماما ويخلي بابا بس اللي يصرف علينا.
