بعد وفاة والده.. حماقي عن أغنية ما بلاش: محستش بفرحة ومكنتش عايز أستعطف الناس
كشف الفنان محمد حماقي كواليس أغنية ما بلاش، التي طرحها عام 2016، وكانت تعبر عن حزنه الشديد لرحيل والده عن دنيانا.
حماقي يتحدث عن كواليس أغنية ما بلاش
وقال حماقي خلال مؤتمر صحفي، أقيم بالأمس على هامش مشاركته في مهرجان قرطاج الدولي: مكنتش عايز من البداية أستنزف مشاعر الناس ولا إن الناس تتعاطف من قبل ما تسمع عشان تحب الأغنية، دي مش طريقتي، واحتفظت بما في داخلي لنفسي، وقدرت أقوله بعد حوالي 7 سنين بعد ما مبقاش فيه شبه استعطاف للناس.
وأردف حماقي: أنا محستش بفرحة ولكن حسيت إن الناس طبطبت عليا، عارف لما تضعف جدا وتلاقي حد بيطبطب عليك وحاسس بيك، هو ده اللي أنا حسيت بيه إني لما عبرت عن وجعي بالأغنية ولقيت كل الناس متعاطفة حسيت كأن الناس بتطبطب عليا، استقبال الناس كان مختلف وحسيت إن الناس في ضهري وحاسين بيا.
وأردف حماقي: وليا واحد صاحبي مخرج اسمه ميدو شعبان كلمني يوم نزول الألبوم ووقف عند أغنية ما بلاش وسألني قالي هي الأغنية فيها حاجة؟ أنا مش حاسس إنها أغنية حاسس إنها أشبه بترتيلة أو بصلاة فيها حاجة روحانية زيادة عن الأغاني، وقولتله كلامك أثر فيا وحكيتله سبب الأغنية قالي وصلني الإحساس وأنا بسمع الأغنية من غير ما أعرف وأظن إن ده اللي وصل للناس.
وأضاف حماقي: صدق مشاعرك في الغنا أسرع وأسهل طريقة لوصول الأغنية للجمهور، كل ما كنت صادق في اللي بتقوله كان الوصول للناس أسهل، ودي مدرستي في الغنا، مش بغني من دماغي أنا بغني من مشاعري ومن جوا ولازم أبقى مصدق.
