رضا حامد: بُعدي عن الوسط الفني مش بإيدي.. ومعرفش هعيش ازاي من غير شغل
كشف الفنان رضا حامد، أسباب ابتعاده عن الوسط الفني، مشيرًا إلي أن شركات الإنتاج تتعاون فقط مع بعض الفنانين ولا تعطى فرص للآخرين.
وقال رضا حامد في تصريح لـ القاهرة 24: بعدي عن الوسط الفني مش بأيدي ونفسي اشتغل.. لكن شركات الإنتاج مركزة في تشغيل ناس معينة.
وأكد رضا حامد: مفيش فرصة لحد تانى ومعرفش هعيش ازاي من غير شغل.
أزمة رضا حامد والزعيم عادل إمام
وكان رضا حامد، قد بادر في وقت سابق، بالصلح مع الزعيم عادل إمام، بمناسبة عيد ميلاد الزعيم، الذي يوافق 17 مايو، حيث أشار إلى أن هناك سوء تفاهم حدث بعد تصريحاته الأخيرة في أحد البرامج، فظن البعض أنه هاجم الزعيم، لانتقاده بعض أفعال عادل إمام معه.
وقال في تصريحات عبر القاهرة 24 مؤخرًا: عيد ميلادي معاه في نفس اليوم، ربنا يديله الصحة دا هرم كبير، تاريخ ومحدش هيعرف يبقى زيه، كون أنه له بعض التصرفات في المسرح بتاعه فهو حر، مش عاجب الممثل يمشي دا المسرح بتاعه.
وتابع رضا حامد: النهاردة عيد ميلادي ومن الصدف الحلوة أنه عيد ميلاد الزعيم كمان، فبقوله كل سنة وانت طيب وربنا يبعد عنك أي مشكلة أو مرض وأي حاجة وحشة.
وتأتي أزمة رضا حامد وعادل إمام، في وقت سابق، بعدما طرده الزعيم من فرقة مسرحية بودي جارد، حيث قال في لقاء تلفزيوني سابق له: اشتغلت مع عادل إمام في فرقته 9 سنين، وحصل قبل كده لقاء مع الأستاذ أسامة كمال، وذكرت أشياء اتفهمت غلط على السوشيال ميديا، فـ ناس نقلت له كلام غلط عني فطردني، مباكلش عيش، حتى العيش مباكلوش، المصريون أجمل حاجة فيهم بيقولوا الحمد لله حتى لو الدنيا مزنقة، الحقيقة برضه معارفي القدام تواروا عن الوسط الفني.
