أحمد فهمي: بنوّع في أدواري عشان أعيش عمر أطول كفنان.. وكل مشاهد سفاح الجيزة صعبة
أكد الفنان أحمد فهمي، أن جميع مشاهد مسلسل سفاح الجيزة، كانت صعبة أثناء تصويره، كما كشف عن رغبته في التوازن بالأعمال الفنية بين اللونين الكوميدي والتراجيدي.
وقال أحمد فهمي خلال حواره مع القاهرة 24: المسلسل كله صعب جدا، كل الممثلين هيشوفوا ده، وهو مجهد جدا مش مثلا مشهدين تلاتة صعبين والباقي عادي، كله كان صعب، بس المخرج هادي الباجوري شاقنا بشكل كويس، والناس لما تشوفه تحكم وتقول حلو ولا مش حلو.
وأضاف أحمد فهمي، متحدثًا عن رغبته في التوازن بين اللونين الكوميدي والتراجيدي: بعد فيلم العارف كنت مقرر إني هعمل توازن، هعمل كوميدي زي مستر إكس مثلًا، وفي نفس الوقت تراجيدي.
وتابع: مكنتش عامل حسابي على مسلسل سفاح الجيزة بالتحديد، بس لقيته مشروع ألطف كمان من اللي كنت ناوي عليه، بس فكرة تغيير الجلد كنت مقررها عشان تفضل قماشتي واسعة، وأفضل عايش لفترة أطول كفنان.
أحمد فهمي: مسلسل سفاح الجيزة يتحمل أكتر من جزء
وعن إمكانية تقديم مسلسل سفاح الجيزة في أكثر من جزء، رد أحمد فهمي: مسلسلات القتلة المتسلسلين والسفاحين عامة، بتتحمل جزء واتنين وأكتر، ومسلسل السفاح يتحمل بس ده يرجع لمدى نجاح الجزء الأول إن شاء الله.
مسلسل سفاح الجيزة
يشارك في بطولة مسلسل سفاح الجيزة، عدد من الفنانين، إلى جانب الفنان أحمد فهمي، أبرزهم الفنانة ركين سعد، باسم سمرة، داليا شوقي، وغيرهم، والعمل من إخراج هادي الباجوري.
