أبيوسف يعلن عن ألبومه الجديد بعد غياب: كنت بعيد حساباتي في حياتي
أعلن مؤدي الراب أبيوسف عن طرحه لألبوم جديد بعد غياب دام لفترة طويلة، بسبب وفاة والدته الإذاعية صديقة حياتي، كما وجه رسالة لجمهوره ومحبيه.
وكتب أبيوسف، عبر حسابه الرسمي بموقع الصور والفيديوهات انستجرام، قائلًا: شكرًا على دعمكم المعنوي اللي كان في آخر فترة أساسي ومهم جدًا، أنا عارف إنكوا مستنيين تسمعوا شغل جديد، وأنا متفهم ده بالذات لأنكو مسمعتوش مني شغل ليا لوحدي، وكنت مهتم أكتر بالتعاونات مع إخواتي كتير أوي، من أول فترة بيتروت، ونصرت العظيم، لرجوعي المكيليل وتعاوناتي مع تاج تيمي توأمي الموسيقي ميمو، والعالمي أوي مزيكو، والعبقري المبجل أحمد سانتا وغيرهم كتير.
وتابع مؤدي الراب أبيوسف: أنا كنت شغال على نفسي الفترة اللي فاتت وأنا عمري ما كنت بخبي عنكوا حاجة فأنا يمكن كنت بعيد حساباتي في حاجات كتير في حياتي، ويمكن أكون غيرت حاجات كتير فيا مكنتش عجباني ولا عاجبه أي حد قلبه عليا، وطبعًا ده مشوار مش بزرار.
واستكمل: فأنا في المرحلة ديه شغال على نفسي، وبشكر كل الأسامي اللي فوق ويزيد عليهم ناس تانيه، عارفين نفسهم على وقفتهم جنبي للآخر.
أبيوسف: أول ألبوم أعمله لوحدي.. وربنا بيحبني علشان انتوا في ضهري
وأعلن أبيوسف عن ألبومه الجديد، حيث قال: ده أول ألبوم أعمله لوحدي من ساعة ألبوم تمام، وشغال عليه بقالي فترة طويلة، وديه مش عادتي، أنا عارف بس منظوري لشغلي ولنفسي ولحياتي أتغير فا ده هينعكس في اللي بعمله، آسف رغيت، بحبكوا يا مجانين يا همج، مش عارف إمتى خالص بس أنا كويس والدنيا تمام الحمد لله، وربنا بيحبني ومتأكد من ده علشان انتوا مهما بغيب بلاقيكوا أكتر من الأول في ضهري.
