أهله مقاطعينه وبيتعاطى مخدرات.. ننشر أقوال زوج المجني عليها على يد شقيقها ببولاق الدكرور | تحقيقات
كشفت التحقيقات في قضية مقتل سيدة على يد شقيقها، أقوال زوج المجني عليها بالتحقيقات وتعاطي المتهم للمواد المخدرة ومشاكله مع أسرته، وسلوكه السيئ الذي اعتاد التعامل به مع أهله ومع جيرانه.
أقوال زوج المجني عليها على يد شقيقها ببولاق الدكرور
وينشر القاهرة 24 التحقيقات في القضية التي حملت رقم 4739 لسنة 2023، بولاق الدكرور والمقيدة برقم حصر 653 لسنة 2023.
وجاء نص التحقيقات كما يلي:
س: ما صلتك بالمتوفاة نورا احمد.ا. ا؟
ج نورا تبقى مراتی.
س: ومنذ متى وتلك الزيجة قائمة؟
ج: حوالي 8 سنين.
س: وما تفصيلات حدوث وفاة زوجتك نورا أحمد السيد أحمد؟
ج: اللى حصل إن أنا كنت فى البيت الصبح مع مراتي وعيالي وعلى صلاة الجمعة نزلت أصلی وبعد كده اخدت ولادي ونزلت قعدت في الشارع على القهوة والأولاد كانوا بيلعبوا قدامى فى الشارع وعلى الساعة 2 بعد الظهر، طلعت البيت أجيب حاجة من الشقة، ومراتي كانت فوق وأنا معاها لقيت أخوها فاروق المتهم جه عندنا، أنا سلمت عليه ونزلت على طول لأولادي فى الشارع وروحت بيهم عند خالي في الشارع اللي جنبنا على طول، وبعد نصف ساعة مش فاكر بالظبط، رجعت على البيت أنا ومحمد ابني وفتحنا الباب ودخلت ملقتش فاروق ودخلت لقيت البلكونة مفتوحة فدخلت أشوفها ملقتهاش فدخلت على المطبخ، لقيتها مربوطة بإيشارب أزرق في الدرج بتاع المطبخ فأنا جريت عليها وفكيت الإيشارب وقعدت أفوق فيها بس كانت مش بترد، وكان في إصابات فيها ودم فى بوقها ووشها فطلعت جري على الجيران وجم يساعدونی کله قالي لازم اطلع بها حالا على المستشفى، وفعلا خدتها وطلعت على أقرب مستشفى، ولما وصلت الدكاترة قالولى البقاء لله وسألوني أيه اللي حصل وتم إبلاغ الشرطة وده كل اللي حصل.
س: متى وأين حدث ذلك؟
ج: الكلام ده حصل الجمعة حوالي العصر في بيتنا في مطبخ الشقة اللي بشارع ناهيا بولاق الدكرور.
س: من كان رفقتك آنذاك حال رؤيتك زوجتك المتوفاة إلى رحمة مولاها؟
ج: كنت أنا وابني محمد.
س: وما هي الحالة التى كانت عليها زوجتك قبل تركك لها كما ذكرت سلفا؟
ج: أنا كنت سايبها عادي قبل ما أنزل مكنش في أى حاجة خالص.
س: ومن كان برفقة زوجتك المجني عليها قبل تركك لها والنزول من المنزل خاصتك كما ذكرت سلفا؟
ج: أنا زي ما قولت قبل كده أنا كنت بصلي الجمعة مع أولادي وبعد الصلاة قعدت على القهوة شويه وعيالی كانوا معايا بيلعبوا فى الشارع وبعدها بشوية طلعت فوق البيت أجيب حاجة وأنا فوق لقيت أخو مراتي فاروق المتهم جه أنا سلمت عليه ونزلت على طول روحت على بيت خالي العمارة اللي جنبی وقعدت نص ساعه تقريبا.
س: وهل كنت على علم بقدوم شقيق زوجتك إلى العقار خاصتك؟
ج: لا، هو أصلا على طول بييجي فجأة كده من غير مواعيد وبيتعمد إني أكون مش موجود.
س: وهل قام ثمة شخص آخر بخلاف المدعو فاروق المتهم بزيارة زوجتك في تلك الفترة التي ذكرتها سلفا؟
ج: لا مفيش حد جه ولو كان فى حد جه كنت هعرف.
س: وما هي الحالة التي كانت عليها زوجتك حال عودتك للمنزل ورؤيتك لها؟
ج: دخلت على المطبخ لقيتها مربوطة بإيشارب أزرق فى الدرج بتاع المطبخ، فأنا جريت عليها وفكيت الإيشارب وقعدت أفوق فيها بس كانت مش بترد وكان فى إصابات فيها ودم فى بوقها ووشها.
س: وما هي الإصابات التي كانت فى زوجتك المجني عليها تحديدا؟
ج: اللي شوفته كان في إصابات فيها ودم في بوقها ووشها.
س: وهل كانت تلك الإصابات موجودة بزوجتك قبل تركك لها كما ذكرت؟
ج: لا مكنش فيها أصلا أي إصابات ديه كانت حامل في الشهر الثالث أصلا وكنا كلنا مخليين بالنا منها.
س: وما الذى بدر منك آنذاك تحديدا؟
ج: أنا اول ما شوفتها في المنظر ده فكيت الإيشارب اللي كانت مربوطة فيه، وحاولت أفوقها بس مكنتش بترد وحتى ندهت على الجيران عشان يساعدوني قالولى لازم أروح بيها أقرب مستشفى.
س: وهل قمت بالتوجه إلى أقرب مستشفى؟
ج: أيوه أنا روحت مستشفى وأول ما دخلت قالولى البقاء لله.
س: وهل يوجد ثمة علاقة أو خلافات فيما بينك وبين شقيق المتوفاة إلى رحمة مولاها سالفي الذكر؟
ج: هو عيلته أصلا كلها بتكرهه ومش بتحبه ومطرود من البيت أنا مفیش بینی وبینه مشاكل بس بردو مفیش بینی وبینه تعامل بحاول أتجنبه.
س: وما هي طبيعة تلك الخلافات تحديدا فيما بين المدعو فاروق وعائلته كما ذكرت سلفا؟
ج: هو أصلا مش شغال حاجة ولما بيشتغل على طول عامل مشاكل وهو أصلا ساكن فى نفس الشارع بتاعنا، على طول عامل مشاكل فى الشارع وعلى طول متخانق مع أهله وعايز فلوس عشان يجيب بيها مخدرات عشان هو بيشرب من زمان.
س: وهل توجد ثمة علاقة أو خلافات فيما بين المتوفاة إلى رحمة مولاها وشقيقها؟
ج: هي مراتي الله يرحمها كانت على طول بتحاول تحتويه عشان أهله كانوا غضبانين عليه ومقاطعينه وأنا عمري ما شوفت إنهم بيتخانقوا قدامی وهي عمرها ما قالتلي حاجة عنه عشان كانت بتخلي صورته کویسة قدامى وأنا مكنتش بحاول أتدخل بينهم بردو.
س: وما هي طبيعة عمل المتهم فاروق ا. ا؟
ج: اللي أعرفه إنه مش شغال الفترة ديه، بس حتى لما بيشتغل بيعمل مشاكل وهو أصلا شغال في المحارة تقريبا.
س: وأين يسكن المتهم؟
ج: هو ساكن معانا فى نفس الشارع بعدينا بحوالي 200 متر تقريبا.
س: وهل سالف الذكر معتاد على زيارة زوجتك المجني عليها؟
ج: هو مش بييجي غير عشان ياخد فلوس بس.
س: وما هو سلوك المتهم فاروق الذي تعرفه عنه؟
ج: هو مشيه مش تمام وبيشرب مخدرات وأهله مقاطعينه وعشان ميعملش مشاكل ليهم بيبعتوا فلوس من فترة للتانية عشان ميجلهمش مشاكل آخرها كانوا باعتين ليه فلوس إيجار أوضته.
