دانا حمدان: الفن رسالة في حد ذاته.. والجمهور محتاج أفلام رومانسية لأنه مضغوط
كشفت الفنانة دانا حمدان عن رأيها في الأعمال التي تقدم خلال الفترة الأخيرة، مشيرة إلى أن الجمهور يريد أفلامًا رومانسية بعيدًا عن الأكشن والكوميدي.
وقالت دانا حمدان لـ القاهرة 24: أنا سعيدة وفخورة أننا بنعمل مسلسلات حقيقية وقضايا موجودة في المجتمع زي تحت الوصاية وموضوعات مهمة ولازم نطرحها؛ لأن مينفعش نكون مغيبين عن الواقع ولكننا محتاجين نبعد عن السلبيات ونتكلم في الإيجابيات.
وواصلت دانا حمدان: بقالنا 10 سنين بنعمل موضوعات تقيلة ومهمة وتمثيل قوي وأعمال مبهرة ولكن الناس مضغوطة ومش قادرين يتفرجوا على الحاجات دي ومحتاجين أعمال رومانسية؛ لأننا تعبنا من السلبيات وكمان متبقاش على الشاشة وعلى الواقع.
وأضافت دانا حمدان: الفن رسالة مهمة ولكن الجمهور عايز يتسلى وعايز ترفيه ومش لازم يتصدم في الواقع.
كما سبق وكشفت دانا حمدان سر غيابها الفني، وقالت في تصريح سابق لـ القاهرة 24: أنا مش برفض أدوار خالص، ومعنديش سبب واضح للغياب ومش بيتعرض عليا أعمال، وفي البدايات عملت أدوار متوسطة ومن حقي أخد خطوة للأمام ومش بهتم بمساحة الدور ولا بالفلوس والأجر، ولكن بهتم أن الدور اللي هقدمه يكون مؤثر، وربنا يبعتلي دور يعلم مع الناس ويبين موهبتي وأمثل فيه حتى لو مشهد.
واستكملت دانا حمدان: نفسي يكون ليا دور في رمضان المقبل ونفسي أعمل برنامج اجتماعي وبسعى لـ دا من سنين ولكن أنا راضية ومؤمنة أن نصيبي لسه ماجاش.
