فلوسه مفيهاش بركة.. مصممة طرح عرائس تمتنع عن تصميم لفة النص حجاب: مش عايزة ذنوب
نشرت إحدى متخصصات لفة طرحة العرائس، عبر حسابها الشخصي بموقع فيسبوك، أنها تمتنع عن تصميم طرحة العروس التي تظهر جزءا من الشعر، وذلك بعد اقتناعها التام بـ حرمانية هذا الأمر.
وقالت نيفين عبدو، متخصصة لفات طرحة العروس، فيل ديزاينر، في حوارها لـ القاهرة 24، في بداية الأمر كنت أعمل في تصميم لفات الحجاب التركي للعرائس، ولكن مؤخرًا ظهرت موضة النصف حجاب والربع حجاب، والتي كثيرًا ما يطلبها العرائس مني، وأنا كنت واحدة في من الأيام منهم، ولكن بدأت أشوف إن العروسة اللي بتكون جاية محجبة الصبح قبل الفرح بتطلع من غير حجاب وشعرها كله ظاهر.
مصممة لفة طرحة العروسة تمتنع عن بعض التصميمات
وتابعت نيفين، بدأت أشوف إن الموضة دي اتنشرت مع اقتناع تام من البنات إنهم محجبات، ودا بالرغم من عمل لفة النص الحجاب اللي بتظهر أكثر من نصف الشعر، ولقيت إن لما بتجيلي واحدة محجبة وتعمل التصميم دا بتكون مقتنعة إنها لسه محجبة.
وأضافت نيفين عبدو، حسيت إن أنا بعمل حاجة حرام وهتحاسب عليها، لأن دوري كـ مصممة حجاب أعمل اللفة المظبوطة شرعًا، وإن مفيش حاجة اسمها نص وربع.. يا حجاب كامل يا مش حجاب.
واستكملت نيفين: أنا لو مصممة تصفيفات شعر وجاتلي واحدة مش محجبة فدا عادي، لكن دا حجاب ومحبش آخد ذنب حد، وبالرغم من القرار اللي خدته دا كان في ناس كتير بتقولي إنه هيوقف الرزق وعدد العملاء هيقل، لكن بالعكس كنت طول الوقت بشوف إن مفيش بركة في فلوس شغلي من الحجاب اللي بيظهر الشعر.
وأشارت نيفين عبدو، إلى أنها امتنعت عن قبول عدد من العرائس اللاتي كن يرغبن في لفة النصف حجاب، بالإضافة إلى أن هذا التوقيت من السنة وهو موسم الأفراح وبه، مشيرة إلى أن هناك العديد من المحيطين بها حذروها من خسارة الرزق بسبب هذا القرار، قائلة: نادرًا لما تطلب مني عروسة لفة الحجاب التركي وتقريبًا بتكون واحدة من بين كل 10 عرائس، بس حسيت إن كل الفلوس اللي بتجيلي بتتصرف بسرعة ومفيهاش بركة، عشان كدا قررت مشتغلش حاجة مش مستريحة فيها.
ونوهت نيفين، بأنها كثيرًا ما فكرت في أخذ هذا القرار، وبالتحديد منذ سنة ونصف، قائلة: أخذت رأي ناس من دار الإفتاء والمشايخ، وفضلت كتير أفكر في الذنب والحجاب، وامبارح أعلنت امتناعي عن تصميم هذا الديزاين.
