نجلاء بدر: الساحل الشمالي مش مناسب لمعيشتك متروحش.. وارحموا عادل إمام
علقت الفنانة نجلاء على تصريحات الفنانة مادلين طبر، المثيرة للجدل عن الزعيم عادل إمام، والتي أدلت بها خلال لقائها مع القاهرة 24، بشأن اختفاء الزعيم وعدم سماح أسرته له بحضور تكريماته وآخرهم في المهرجان القومي للمسرح.
وقالت نجلاء بدر خلال لقائها مع القاهرة 24، على هامش حضورها فعاليات مهرجان القاهرة للدراما بدورته الثانية: نتمنى للزعيم عادل إمام الصحة ومش معقول وهو قاعد في البيت يبقى ملك للناس، يمكن هو مش عايز يشتغل أو مش عايز يظهر دلوقتي.
وتابعت: لازم نحترم خصوصيته زي ما هو احترم مشاعرنا خلال الفترة اللي فاتت، إحنا مرحمناهوش وهو وسطنا، ارحموه وهو بيرتاح وقاعد وسط أسرته اللي اتحرم منها سنين.
نجلاء بدر ترد على منتقدي الساحل الشمالي: مش مناسب لمعيشتك متروحش
كما ردت نجلاء بدر على منتقدي الساحل الشمالي بسبب غلاء أسعاره، قائلة: الساحل الشمالي مناسب لكل الفئات وكل واحد يروح الشاطئ المناسب ليه، وقصة أن في شواطئ غالية ده موجود في كل العالم.
وأضافت: اللي مش مناسب ليا مايرحش، ومش شرط اروح عند المنطقة دي وانتقدها، الساحل بيخاطب كل الفئات، مناسب لمعيشتك روح، مش مناسبة متروحش، المهم تتبسط.
تصريحات مادلين طبر عن عادل إمام
ومن ناحية أخرى، سبق وأن تحدثت مادلين طبر في لقائها مع القاهرة 24، على هامش ختام المهرجان القومي للمسرح في دورته الـ 16 عن الزعيم عادل إمام، إلا أنها أخطأت -حسب وصف كثيرين- في الحديث عن أسرته، حيث اتهمتهم بأنهم سبب منعه عن الظهور، كما صرحت بأنها لا تعرف طريقًا للتواصل مع أبنائه للاطمئنان على الزعيم.
