المايسترو هاني فرحات عن حفل ليلة الدموع: الأوركسترا كانوا بيعزفوا وهما بيعيطوا.. وأنا آسف على النكد

أعرب المايسترو هاني فرحات، عن سعادته البالغة بردود فعل الجمهور على حفل ليلة الدموع، التي أُقيمت في مدينة جدة، على مسرح بنش مارك، منذ يومين، بمشاركة العديد من المطربين.

وقال هاني فرحات لـ القاهرة 24: أنا قولت الناس هتشتمني وتقول هي ناقصة نكد، بس هي حاجة كويسة فعلا إننا نطلع النكد وطاقة الحزن من جوانا، حاجة صحية جدا، وفكرة حفلة ليلة الدموع نفسها أنا نفسي منبهر بيها. 

وتابع: وأنا في العادي مش بنبهر بسهولة عشان شوفت كم حاجات في العالم عظيمة وكتير، بس الفكرة دي أبرهتني عشان غريبة وبرة الصندوق خالص وناجحة جدا، لأن خروج الحزن ومشاعر الكآبة من قلوبنا حاجة كويسة. 

وأضاف هاني فرحات: الحفلة كانت عظيمة واختياراتها عظيمة، وأنا طلّعت كم أحاسيس غير عادية، وجه وقت في الحفلة فريق الأوركسترا كلهم جالهم إنهيار، وأغلب العازفين كانوا بيعيطوا بحرقة كبيرة، بسبب موقف درامي حصل، كانوا بيعزفوا وهما بيعيطوا، والمطربين كلهم أدوا بأحسن ما عندهم.

هاني فرحات: شيرين عبد الوهاب كانت مفاجأة

وأردف هاني فرحات، مشيرًا إلى أن مشاركة شيرين عبد الوهاب في الحفل كانت بمثابة مفاجأة، وقال: اتبسطت مع المطربين ومفاجأة شيرين كانت عظيمة، واتبسطت أوي معاها، الشباب كلهم كانوا كويسين والأغاني والمزيكا حلوة، بشكر الأوركسترا لأني قعدتهم 3 أيام متواصل، مش بيناموا وتعب رهيب.

واختتم فرحات حديثه، قائلًا: الحمد لله الناس اتبسطت وكل الناس كانوا على قد المسئولية وكانوا بيتشغلوا من قلبهم وعندهم حماس إن المشروع ده ينجح، حتى فريق الكورال، كانت حفلة مكتملة، وأنا آسف على النكد، بس هي حاجة صحية زي ما قولنا.

حفل ليلة الدموع

شارك بحفل ليلة الدموع بجدة، كل من: الفنان أحمد سعد، آدم، شيرين عبد الوهاب، تامر عاشور، حمادة هلال، وغيرهم.

هاني فرحات: شيرين مفاجأة ليلة الدموع.. ونجاح الحفل بسبب إصرار الأوركسترا والمطربين