قررت مش هعيش في جلباب محمود ياسين ورفض يضربني عشان ابني.. أبرز تصريحات محمد رياض
حلّ الفنان محمد رياض، ضيفًا على الإعلامي عمرو الليثي، في برنامج واحد من الناس، المذاع عبر قناة الحياة، وكشف خلال الحلقة أسرارًا عن علاقته بحماه الفنان الراحل محمود ياسين، حيث أكد أنه رفض ضربه مراعاةً لمشاعر حفيده.
ونستعرض في السطور التالية أبرز تصريحات محمد رياض خلال الحلقة:
-جالي اكتئاب بسبب دوري في مسلسل العائلة وحصلي تخبط في حياتي بسببه.
-كنت موجود في مسلسل العائلة وبعدين اتشلت وصوروا شهرين من غيري وبعدين رجعت تاني مش عارف إزاي.
-كنت بصور مشهد مع محمود مرسي في مسلسل العائلة واتحولت لمتفرج مبقتش عارف أتكلم ونعيد المشهد أكتر من مرة وأنا ساكت.
-اشتغلت مع محمود ياسين في مسلسل التوبة ودعمني بس رفض يضربني بالقلم في مشهد عشان خاطر مشاعر حفيده وابني عمر وإنه هيتعقد بسبب ده.
-محمود ياسين من أفضل الشخصيات الإنسانية وفي رأيي وهو أفضل فنان قدم الأدوار السايكو.
محمد رياض: مكنتش عايز أشتغل في جلباب حمايا
-كنت بصور مع محمود ياسين قبل ما ارتبط بـ رانيا بنته وقولت أكيد ميعرفنيش لكنه جه سلم عليا وقالي أنت ممثل كويس أوي.
-مكنتش عايز أشتغل في جلباب حمايا عشان في فترة كان في حساسيات وهيقولوا ده بيشتغل عشان حماه.
-محمود ياسين قالي ليه مش عايز تشتغل معايا أنا نفسي أشتغل معاك فنزلت تاني يوم مضيت معاه بعد الكلام ده.
-الكوميكس اللي بتتعمل على أدواري ومشاهدي بتضحكني أوي وبالذات كوميك البنت دي غريبة جدًا.
-المخرج أحمد توفيق له فضل عليا وخادني في فوازير اسمها كلمة في غنوة في بداياتي.
