مؤلف سفاح الجيزة يكشف سبب استبدال أغاني شفيقة بـ بدرية السيد وما علاقة البطل بها؟
كشف المؤلف محمد صلاح العزب، أنه كان من المقرر استخدام صوت المطربة شفيقة، في مشاهد مسلسل سفاح الجيزة، بطولة الفنانة أحمد فهمي، بدلًا من أغاني المطربة بدرية السيد، التي عرضت بالفعل ضمن أحداث العمل.
وقال محمد صلاح العزب، في تصريحات لـ القاهرة 24: كنت كاتب في السيناريو إنها تكون شفيقة اللي بتغني في المشاهد، بس المخرج شاف إن بدرية السيد هتكون أنسب ودي حاجة بتاعة المخرج، والصوتيات والمزيكا بتكون اقتراحات وبنور للمخرج المفروض يعمل إيه بس، لكن العمل النهائي بيكون شغل المخرج بشكل كامل، وأنا معجب باللي هو عمله مش متضايق.
وعن سبب اقتراح محمد صلاح العزب، في السيناريو الخاص بـ سفاح الجيزة، استخدام صوت شفيقة، قال: كنت مقترح نستخدم أغاني شفيقة عشان هي متعلقة بحاجة حصلت له وهو صغير، وفي ظرف معين وكان شغال شفيقة، فلما كبر بقى بيسمعها برضه، وفضل مرتبط بيها، ودي حاجة متعلقة بصميم الدراما هنشوفها في الحلقات الجاية.
محمد صلاح العزب: مش بنعمل فيلم تسجيلي عن السفاح
وعلى جانب آخر، كان أكد محمد صلاح العزب، أن مسلسل سفاح الجيزة ليس فيلم وثائقي عن الشخصية الحقيقية، بل فقط استوحوا أحداث العمل من جرائمه، وقال: إحنا مش بنعمل عمل توثيقي أو فيلم تسجيلي عن السفاح عشان نحتاج نكلم أهله، ونعرف تفاصيله، إحنا مش بنعمل حاجة متعلقة بحياته الحقيقية، إحنا بنعمل عمل درامي هو بالكامل من خيال المؤلف، لكن مُستند على وقائع حقيقية وهي جرائم السفاح.
