المخرج هشام الرشيدي: غادة عبد الرازق تعاملت مع حكاية تحت الحزام كأنه أول عمل في حياتها
كشف المخرج هشام الرشيدي، كواليس تعاونه مع الفنانة غادة عبد الرازق، في حكاية تحت الحزام، ضمن حكايات مسلسل حدث بالفعل، والمقرر عرضها يوم 13 سبتمبر المقبل.
وأوضح هشام الرشيدي في تصريحات خاصة لـ القاهرة 24 أن غادة عبد الرازق تعاملت مع هذا العمل بجدية كبيرة، وقال: الشغل معاها إضافة، وهي برغم كاريرها والأعمال الكتير اللي عملتها، إلا إنها ادت للمشروع إحساس إنه أول عمل تعمله في حياتها.
وأردف قائلا: بتركز جدا وبتذاكر، برغم إن ظروف التصوير كانت متعبة كعدد ساعات تصوير، لأن قصة الحكاية كأنها فيلم مش مسلسل، فالبطل الأساسي للفيلم بيبقى واخد أكبر عدد مشاهد، بيوصل لـ 80 في المية من القصة، وده بيخلي الحِمل يزيد عليها أكتر، بس ولا مرة حسيت إنها تعبانة أو مش حابة.
وتطرق هشام الرشيدي، للحديث عن قصة مسلسل حدث بالفعل، وقال: حدث بالفعل معتمد على حوادث حصلت فعلا في الوطن العربي، وكلها تندرج تحت غطاء المرض النفسي، وسبب ودوافع الأبطال هتكون ليها علاقة بالأمراض النفسية.
هشام الرشيدي: كل حكاية في حدث بالفعل فيلم منفصل
وأردف الرشيدي: وقصة تحت الحزام من أكتر القصص اللي فيها تحدي بالنسبالي، لأن من أول حلقة هنبقى عارفين مين اللي عمل كدة، بس هنفضل معاها طول الرحلة عشان نعرف هتخرج إزاي من الجريمة اللي هي عملتها، وكل قصة هتكون مسرودة بشكل مختلف، يعني كل حكاية هي فيلم منفصل.
حكاية تحت الحزام
يشارك في بطولة حكاية تحت الحزام، الفنانة غادة عبد الرازق، سلمى أبو ضيف، خالد أنور، وآخرين، والعمل من تأليف فادي النجار، وإخراج هشام الرشيدي.
