أنغام: مشفتش والدتي سعيدة يوم.. ومريت باكتئاب لسنين طويلة وأخدت أدوية
تحدثت الفنانة أنغام عن أصعب موقف تعرضت له في طفولتها، وعن تعرضها للاكتئاب ورأيها في الإعلام الحالي.
وقالت أنغام خلال لقائها في برنامج AB TALKS: بعد ما شوفت أبويا بيضرب أمي وأنا طفلة مبقتش اسلم عليه ولا أبوسه، وبعمل ده وأنا مرتاحة، وبقى عندي مسئولية أني أحمي ماما طول الوقت.
وأضافت أنغام: سألت والدتي ليه كملتي مع والدي بعد ما ضربك، وكان ردها عليا كنت هعمل ايه هروح بيكم فين انتوا الاتنين، مشفتش والدتي سعيدة يوم، ولومتها بقسوة وأمي مكنش ليها ظهر من أهلها، وأخويا ملحقش يشوف أخت عادية في البيت، هو وعي وأنا كنت مشهورة ومسئولة، وأنا مديله العذر في كل حاجة.
أنغام: الموسيقى هي حياتي.. ومرت بـ اكتئاب لسنين طويلة
وعن حبها للموسيقى، أردفت أنغام: الموسيقى هي حياتي هي طريقة التعبير واحساسي.. وبحب الشهرة في النجاح، ومش بحبها في أشياء أخرى وتعامل الناس معاها.
وعن رأيها في الإعلام، أوضحت أنغام: أنا في غاية الامتنان للإعلام اللي أنا خرجت منه اللي كان في بداياتي.. الإعلام الحالي بتأقلم عليه أنا جاية من زمان مختلف، ومش بحب أشوف نفسي ضعيفة او مهدوده ومش بعرف ابين ده، ومرت بحالات اكتئاب كتير في سنين طويلة كنت مكتئبة وقعدت سنين أخد أدوية، وكنت منفتحه عاطفيا وده كان غلط في تجربتي.
