أمه ملحقتش تفرح بيه.. ننشر صور شاب لقي مصرعه على يد جاره ووالدته في إمبابة
حصل القاهرة 24 على صور سائق توك لقي مصرعه على يد جاره ووالدته، خلال مشاجرة نشبت بينهم بسب أولوية المرور في إمبابة، واستقبل الضحية 5 ضربات نافذة بسلاح أبيض أدت إلى مصرعه في الحال.
مصرع سائق توك توك على يد جاره بإمبابة
والتقى القاهرة 24 بأسرة ضحية التوك التوك في إمبابة، وروت والدة المجني عليه تفاصيل اللحظات الأخيرة لنجلها وحزنها الشديد، بسبب مصرعه قائلة: ابني كريم مات على يد جاره ووالدته، ده كله بسبب خناقة ومشادة كلامية بين المتهم وابني عشان سبب تافه وهو مين فيهم يعدي الأول، ومسكوا في بعض، والناس حجزت وكل واحد راح لحاله، بعدها اتفاجئنا إن المجرم جه على البيت هو وأمه ولما ابني نزل له طلع مطواة وضربه 5 ضربات بسلاح أبيض في قلبه ووقع على الأرض ما اتحركش ومات على طول.
من جانبها، قالت شقيقة المجني عليه: أخويا كان ماشي بالتوك توك في طريقه لبيت جدته، وأثناء سيره اتفاجئ بشخص قطع عليه سكته بدراجته النارية، ولما طلب منه يعديه لأنه قافل الطريق رفض، بعدها دارت بينهم مشادة كلامية والناس حجزت بينهم وكل واحد مشي في طريقه وافتكرنا الموضوع خلص.
وتابعت شقيقة المجني عليه: تفاجأنا بمجموعة من الناس بعدها بكام ساعة شايلين أسلحة جايين ناحية بيتنا وبيسألوا على أخويا، ولما نزل لهم يشوف عايزين أيه مسكوه من التيشرت وضربوه بسلاح أبيض في القلب والبطن.
وأشارت شقيقة الضحية إلى أنه خلال المشاجرة صاح أحد المتهمين، بعبارة ما زال صداها في أذني ولم أنسها: أنت بتنضرب ولسه واقف.. والله لأخلص عليك، بعدها استمر في ضرب شقيقي حتى سقط مفارقا للحياة.
وعادت الأم لتتحدث بصوت مكلوم أن آخر مرة التقت فيها نجلها كان قبل خروجه من المنزل للعمل، حيث إنه استيقظ في الساعة الثامنة صباحًا حتى يباشر عمله على التوك توك، معلقة: آخر مرة شوفت ابني كان الصبح قبل ما ينزل يشتغل على التوك توك وقالي ادعيلي ياما.. أنا عايزة حق ابني اللي اتحرمت منه وملحقتش أفرح بيه.
