أميرة أديب: أنا لو اشتغلت بالواسطة هكون في حتة تانية.. ورفضت أعمال بسبب وجود أهلي فيها
كشفت الفنانة الشابة أميرة أديب حقيقة دخولها الوسط الفني بالواسطة، حيث إن والدتها الفنانة منال سلامة وخالها الفنان شريف سلامة ووالدها المخرج عادل أديب، وعمها الإعلامي الشهير عمرو أديب.
وقالت أميرة أديب خلال لقائها مع القاهرة 24: أنا متفهمة إن الناس ممكن تكون شايفه كده وحتى لو أنا داخلة بالواسطة مع إن ده مش حقيقي، ولكن بحاول أثبت نفسي عشان الناس تقول البنت دي تستحق، بجد عملت حاجات كتير من غير ما الناس تعرف أهلي مين وكوني من أسرة فنية والحمد لله.
وتابعت أميرة أديب: متفهمة كلام الناس وابتديت شغلي على السوشيال ميديا ودي مفيهاش وسايط ولحد وقت قريب مكنوش يعرفوا أنا بنت مين ومكنتش بقول أي حاجة، ولحد وقت قريب أوي بدأت أحط صوري مع عيلتي، بقيت عايزة أحط صورة مع أمي أو خالي، وحسيت إني لازم أشيل الموضوع ده من دماغي لأني هتعب وبدأت تجيلي أعمال عشان عيلتي فيها وأرفضها.
وأردفت أميرة: ماما عايزاني أفضل ديمًا متواضعة، ومش بنتكلم في الشغل ممكن أقولها بعد ما أشارك في عمل أو أخد رأيها، مش زي الناس فاكرة.
وواصلت أميرة أديب حديثها، قائلةً: أنا عايشة عشان نفسي واعمل حساب أهلي وحساب الأخلاق، لكن أنا مش عايشة عشان أرضي حد، وأهم حاجة بالنسبة لي في أي عمل هو النص وأول حاجة ببص عليها.
واختتمت أميرة أديب حديثها عن الواسطة، قائلةً: ولو أنا بشتغل بالواسطة كان زماني في حتة تانية خالص وأنا واخدة وقتي تمامًا وأنا بني آدمة صبورة جدًا واللي ربنا كاتبهولي هو اللي هيتعمل في الآخر وأنا عايشه كده، وكمان أنا دارسة ده 4 سنين وخدت ورش تمثيل كتير وعامله اللي عليا.
