اتضرب واتعرض لأذى نفسي.. أم تشكو من إهمال حضانة شهيرة بمنطقة التجمع
تشكو سيدة تدعى ندى، من سوء معاملة ابنها الصغير من قبل المسؤولين، في حضانة تريليم بالتجمع، وذلك بعد تعرض نجلها للضرب المتكرر.
تفاصيل إهمال الحضانة
وقالت ندى عبر حسابها الخاص على إنستجرام: أنا بكتب الكلام ده وأول مرة في حياتي، أكتب حاجة وحشة حصلت لي، بس عشان اللي حصل كان مع ابني في الحقيقة، حاسة بغضب ووجع رهيب متمناش لأي أم تمر بيه.
ابني تعرض للأذى النفسي
وأضافت: ابني اتعرض لأذى نفسي رهيب في حضانة تريليم، الموضوع بدأ بأنه كان بيتعض جامد، وكتير ورا بعض من أطفال معاه في الفصل..ابني زي أطفال كتيرة لسه مش بيعرف خالص يدافع عن نفسه أو حتى يوقف اللي بيعضه، لدرجة أنه وصل بيه الحال أنه يتعض من طفلة معدية عادي وهو واقف في حاله وبيتصدم مش بيعيط، ولا حتى بيدي أي تعبير.. الموضوع بدأ يأثر عليه نفسيًا بشكل رهيب، وبعد ما كان حابب يروح الحضانة، بدأ يعيط جامد ورافض يخش الفصل وماسك فيا.. ده غير أنه منهار دايمًا وبيصحى بليل يصرخ والله.
وأكملت الأم: بقالنا شهرين على الحال ده وأنا بحاول اشتغل على نفسيته وبتكلم معاه كتير، وإزاي يدافع عن نفسه وكلمتهم في الحضانة أنهم يركزوا أكتر مع الأولاد في الحتة دي.
وواصلت الأم: آخر موقف أنه اتعض 3 مرات في أسبوع واحد، ومرتين من نفس الطفلة، وأنا أم عارفة أنه وارد جدًا الأطفال يضربوا بعض، أنا مبلومش البنت خالص، بس اللي حصل آخر مرة كان للأسف موقف يوجع أي أم، فكان كل اللي بالنسبالي إني عايزة حل للوضع ده عشان ابني كده بيتأذي نفسيًا.. كان بيلعب عادي ونازل من الزحليقة ومبسوط راحت جريت عليه فجأة وعضته جامد جدا تحت عينه.. هما احتووا الموقف معايا جدا قعدنا واتكلمنا في خطة إزاي نعلم الولد يوقف اللي بيضربه وأنهم هينقلوا الطفلة دي فصل تاني وهيفصلوها أسبوع في البيت عشان يحاولوا يقطعوا العادة دي والدنيا عندها تتحسن.. وهنا بقي المفاجأة.
وتابعت الأم: رايحة أوصل ابني عادي انهاردة وفاهمة أنهم ناس محترمين هيوفوا بوعودهم ويلتزموا بالخطة اللي حطوها عشان ابني وكالعادة مش راضي يخش فدخلت معاه لحد الفصل عشان أحاول اقنعة يخش لقيت الطفلة قاعدة جوة عادي جدا وال teacher بتاعتة اللي عارفة كل الـ case بتحاول تقنع داوود ابني يقعد على نفس التربيزة اللي عليها البنت اللي خايف يدخل بسببها.. فجأة ابني راح بصلي وقالي: مامي وقال اسمها عضت داوود هنا يا مامي.
واختتمت: المدرستين راحوا بصوا لبعض واخدوني برة، وواحدة منهم بتفتحلي فيديو ل داوود وهو بيلعب عشان تلهيني.. رحت قلتلها معلش أنا أسفة هي دي الطفلة اللي عضت داوود؟ سکتت واتوترت رحت قلتلهم والله انتوا بتهزروا.. واخت ابني واتخانقت معاهم إن انتوا إزاي بتوعدوا الأهالي بكلام عشان تسكتونهم ومش بتوفوا بيه ازاي بتيجوا على عيالنا كدة والله.. الولد اتأذى نفسيًا عندكم وأنا كنت طول الوقت بحاول أساعد ابني واساعدكم وسایباه عشان أنا فاكرة انكوا حضانة محترمة وصادقين في كلامكم وقلبكم علي ابني زي ما بتقولوا.
