نادر حمدي: الذكاء الاصطناعي مفيد جدا وبستخدمه.. وهذا رأيي في لقب صوت مصر
عبّر الموزع الموسيقى نادر حمدي، عن رأيه في الذكاء الاصطناعي وتحديدًا في مجال الموسيقى، كما علق على لقب صوت مصر، الذي أثار جدلًا واسعًا في الفترة الماضية.
وقال نادر حمدي خلال حواره مع القاهرة 24، عن الذكاء الاصطناعي: كل حاجة جديدة، مفيدة وهتودينا في حتت تانية مختلفة، الذكاء الاصطناعي مهم جدا في حاجات كتير مش بس الغناء، وممكن أستخدمه واستخدمته بالفعل في حاجات، بس على فكرة هو الذكاء الاصطناعي طول عمره موجود وخصوصا في المزيكا، بس ظهر مؤخرا بشكل كبير.
وأضاف نادر حمدي: كمان موضوع تركيب صوت مطرب على أغنية مطرب تاني حاجة جميلة، أنا عن نفسي سمعت تراكات كتير لمطربين بأصوات مطربين تانيين كان شكلها أحلى من اللي كانت عليه، وحسيت لو كانت نزلت بالصوت ده كانت هتبقى أحلى.
كما تطرق نادر حمدي، للتعليق على انتقاد الجمهور للمطربين المصريين الذين يغنون في السعودية حاليًا، وقال: مش عارف ده بيحصل ليه، بس أنا شايف إنه بالعكس دي دولة نشيطة فنيًا، زي مثلا دولة لبنان في فترة كانت نشيطة وكل المطربين بيروحوا.
وأردف حمدي: دلوقتي السعودية هي اللي مشهورة بده، والأغنية المصرية جمهورها بيكون الوطن العربي كله، غير الأغنية المغربية مثلا بيكون جمهورها هو جمهور المغرب بس، فده سبب تواجد المطربين المصريين في كل حتة إن كل الجمهور بيحبهم، وبيحبوا الأفلام المصرية كمان مش بس الأغاني.
نادر حمدي: أي حد مصري هيبقى صوت مصر
كما علق نادر حمدي، على الجدل المُثار حول لقب صوت مصر، وقال: أي حد مصري هيبقى صوت مصر، بس اللقب نفسه ده الجمهور اللي بيطلقه على الفنان مش أكتر.
واختتم نادر حمدي حديثه، كاشفًا أعماله المقبلة، كما أكد أن نجله الطفل ورث جينات حب الموسيقى منه، وقال: إن شاء الله عندي حفلة مع واما قريب ضمن مهرجان الموسيقى العربية، وابني عنده جينات موسيقية وبيحب الموسيقى جدا.
