خالد محمود: أنا بقدم فن حلال مش قلة أدب ولا بلطجة.. وشباب كتير بطلت مخدرات بسبب دور عملته
كشف الفنان خالد محمود رأيه في حرمانية الفن، مؤكدًأ أن الأدوار التي يقدمها حلال وأنه متمسك بمصطلح السينما النظيفة.
خالد محمود يكشف رأيه في حرمانية الفن
وقال الفنان خالد محمود خلال لقائه مع القاهرة 24، إن الرسول صلى الله عليه وسلم حسم كل شيء عندما قال الحلال بين والحرام بين، متابعًا: كل حاجة فيها حلال وحرام، يعني الموظف اللي بيتعبنا ويلوي دراعنا ويفتح الدرج، واللي قاعد في كشك وبيسرقنا في الأسعار كل ده حرام.
وأضاف خالد محمود: كل المهن فيها حلال وحرام واللي إحنا عاوزينه هو اللي هيكون، وأنا بقدم فن حلال، وقبل كدا قابلني شباب بطلوا الأدمان بسبب دور عملته، أنا وقتها عرفت أن الرسالة وصلت، دا العمل اللي بيوصل للناس بصدق.
خالد محمود: رفضت أدوار القبلات ومتمسك بالسينما النظيفة
وأكد الفنان خالد محمود أنه رفض العديد من الأدوار الفنية بسبب المشاهد التي كانت تحمل قُبلات وأشياء لا تتناسب مع الذوق العام للجمهور، موضحًا: قبل كدا اختلفت مع مخرج وقولتله مش هعمل الدور ده عشان مش هنوصل الرسالة بالقبلة، لا دا المعنى ولا دا الهدف من الفن.
وأكمل خالد محمود: الفن رسالة مش بقلة الأدب ولا البلطجة ولا القبلات، ومش هي دي رسالة الفن، رسالة الفن أننا بنوصل بالقيمة والأخلاق والأدب والرقي للمشاهدين، والمبادئ لا تتجزأ، يعني اللي شغال مهندس مش هيبيع نفسه في مكان ويبقى محترم في مكان تاني، لذلك أنا متمسك بمصطلح السينما النظيفة ومش هعمل حاجة مخلة.
