هددتها بصورة العقد العرفي عشان آخد حقي منها.. اعترافات مثيرة للمتهمة بإنهاء حياة صديقتها بطنطا│انفراد
اعترافات مثيرة أدلت بها المتهمة آية هاني قاتلة صديقتها فرح محمد في القضية المعروفة إعلاميا بـطالبة طنطا أمام جهات التحقيق، وأقرت خلالها بارتكاب الواقعة بالاشتراك مع صاحب الشقة ويدعى بيشوي.
وينفرد القاهرة 24 بنشر اعترافات قاتلة صديقتها بطنطا، حيث استمعت جهات التحقيق إلى أقوال المتهمة، وأعقبها تمثيلها الجرمية في الشقة محل البلاغ.
اعترافات مثيرة لقاتلة صديقتها
وقالت آية هاني المتهمة بقتل طالبة طنطا: اللي حصل إن فرح محمد رجب دي صاحبتي من حوالي 3 أو 4 سنين، ومن شهور هي طلبت مني صورة البطاقة بتاعتي عشان تعمل عقد إيجار شقة طرف شاب يدعى بيشوي، وده كان صاحب الشقة وقتها فبعتلها صورة البطاقة بتاعتي وهي عملت عقد إيجار باسمي ومش أنا اللي مضيت عليه، وبعدين هي قعدت في الشقة دي وأنا كنت أوقات بروحلها أبات معاها يوم أو يومين مش أكتر، وبعدين هي كانت بتستلف مني فلوس وكمان إديتها مقدم موبايل وكان 3500 جنيه، وإديتها 200 جنيه بعدها وبعدين أنا كنت بطالبها بالفلوس دي ومكانتش بتديني فلوس وبتقولي لما أمي تطلع من السجن هديكي الفلوس ومشفتش منها حاجة، وبعدين أنا كنت بطالبها بعقد الايجار اللي باسمي وبطالبها بالفلوس وهي مكانتش بتديني حاجة.
صورت العقد العرفي
وأضافت المتهمة خلال التحقيقات: أنا من شهر كنت عندها في الشقة وشفت عقد جواز عرفي ما بين فرح وما بين حد تاني مش فاكرة اسمه، فأنا قلت أصوّره عشان أخد حقي منها فصورته بالموبايل بتاعي وبعدين أنا في يومها قلتلها وهددتها بالعقد ده، وقلتلها أنا عايزة عقد الإيجار والفلوس وهددت بيشوي صاحب الشقة بأنه لو ما إدانيش عقد الإيجار اللي باسمي هقول لأهله إنه على علاقة بـ فرح، وبعدين من حوالي 9 أو 10 أيام مش فاكرة بالضبط اليوم، لقيت فرح بتكلمنى وبتقولي تعالي خدي عقد الإيجار والفلوس فأنا رحتلها في نفس اليوم وكانت الساعة 12 بليل فخبطت على الباب وهي كانت سايبة البوابة مفتوحة فطلعت عادي وفتحتلي الباب وتربست علينا وده الطبيعي بتاعها، وقعدنا وأنا قلتلها فين عقدي وفين الفلوس، فقالت موجودين وكانت بتضحك.
كانت عاوزة تقتلني
وتابعت المتهمة: قلتلها هاتي حاجتي واتعصبت، فلقيتها أخدت السكينة من جنبها وقالتلي إنتي هتموتي ودخلت عليّا بالسكينة وكنا بنتلاوع وأخدت منها السكينة وجيت أجري هي شدتني من رجلي فوقعت علي وشي والسكينة في إيدي اليمين، وبعدين أنا كنت بحاول أفلت منها ففلت بإيدي منها وخبطها بالسكينة في جنبها اليمين ووقعت على الأرض على ضهرها.
وكانت الأجهزة الأمنية عثرت على جثة الفتاة في حالة تعفن، ملقاة على شاطئ مصرف قرية سبرباي بدائرة مركز طنطا وساقيها مفصولتين وملفوفتين داخل عباءة.
وأمام ذلك تم تشكيل فريق بحث جنائي ضم ضباط البحث الجنائي بمديرية أمن الغربية وضباط المباحث الجنائية بدائرة مركز طنطا، وتم تحديد هوية المجني عليها وتبين أنها تدعى فرح م. ر. مقيمة بدائرة قسم ثان طنطا، وأن وراء ارتكاب الجريمة صديقاتها وتدعى آية ه. م. طالبة، بالاشتراك مع أحد الأشخاص ويدعى بيشوي.ن. ع - صاحب محل ملابس ومقيم بقرية سبرباي بدائرة مركز طنطا، وبتقنين الإجراءات اللازمة حيال الواقعة، تم إلقاء القبض على المتهمين وبمواجهتهما اعترفا بارتكاب الواقعة.
