مدير أعمال هشام ربيع.. طلبوا مني أخون بوسي وأديهم إيصالات الأمانة | تحقيقات
كشفت التحقيقات في القضية رقم 2409 - 2023 جنح المقطم، والمتهم فيها هشام ربيع زوج المطربة بوسي بالاعتداء على شخص وسرقة شيكات وأوراق خاصة بالمنتج وليد فطين طليق المطربة بوسي، تفاصيل جديدة.
وحصل القاهرة 24 على نص تحقيقات القضية، وجاءت أقوال أحمد محمد مصطفى مدير أعمال هشام ربيع.
أقوال مدير أعمال هشام ربيع في قضية طليقها المنتج وليد فطين
وأمام جهات التحقيق قال مدير أعمال هشام ربيع: اللي حصل إن كفتة الفوال جه فرع التجمع عند هشام ربيع وأنا كنت متواجد وطلب من هشام أنه يحل موضوع بوسي مع طليقها فطين علشان الأخير معاه شيكات وإيصالات أمانة على بوسي زوجة هشام ربیع، فهشام كلفني إني أروح قسم الهرم مع كفتة علشان أتأكد إذا كان فيه فعلا شيكات أو إيصالات أو أي أوراق خاصة بزوجته بوسي في حوزة فطين أو غيره، وعليه تم تحديد موعد من قبل كفتة الفوال للذهاب إلى قسم الهرم لمقابلة فطين لرؤية أو التأكد من نسخة الأوراق التي بحوزته، وعليه فطين أبلغني أنه لديه شيكات أمانة وإيصالات أمانة طرف أحمد يوسف طلبة وهو يريد مبلغ 2.5 مليون لإنهاء المشاكل بينه وبين طليقته بوسي.
وأضاف: أخبر كفتة برقم تليفون أحمد يوسف ابن عمه علشان يكلمه ويقابله وبعدها كفتة اتصل بأحمد يوسف بعد ما أخد الرقم من فطين وحدد ميعاد يوم الأحد 2023/2/19 الساعة 3 العصر وبلغ هشام ربيع بالميعاد وطلب من هشام ربيع ضرورة تواجدي كمحامي عن هشام ربيع وبالفعل تم مقابلة أحمد يوسف طبلية هو والده وأسامة مدير أعمال فطين بكافيه بالمعادي ولما أنا سألت أحمد يوسف عن الإيصالات والشيكات رد وقال إنه حضر للتفاوض فقط من غير الأوراق، فرد كفتة وقال إن احنا مخلصين مع فطين بمبلغ 2.5 مليون فرد أحمد وقاله دول 3 مليون، لأن فيه 300 ألف أتعابي و200 ألف أتعاب محامين، ليصبح الإجمالي 3 ملايين جنيه، وأنا رديت وقولتله إن الاتفاق اتغير وكمان انت مش معاك أي أصول للأوراق، وطلبت من الاضطلاع على التوكيل الخاص بينه وبين فطين فمكنش معاه فبعدها اتفقوا أن كفتة وأحمد طبلية، هيروحوا مكتب تامر أبو سريع لإحضار عدد 2 إقرار تنازل وشيك وأنا رجعت مكتبي وهو ده كل اللي حصل.
وفي نفس السياق جاءت أقوال المطربة بوسي كالتالي:
س: ما قولك فيما شهد به دفاع طليقك وليد فطين واتهامه لزوجك هشام ربيع بالاعتداء على شخص وسرقة 14 شيكا بنكيا و22 إيصال أمانة محررة بمعرفتك لصالح طليقك بقيمة 8 ملايين جنيه وأوراق خاصة بتحقيقات النيابة العامة؟
ج. كلامهم ده غير صحيح وأنا مفيش أي حاجة عليا والشيكات لأن طليقي في غضون عام 2020 أقر بذلك في عقد اتفاق مؤرخ 2020 بعدم ظهور أي شيكات أو إيصالات أمانة وبالتالي أي حاجة بتظهر فهي غير قانونية.
س: وبما تبررين ما شهد به دفاع المنتج وليد فطين بتحقيقات النيابة العامة واتهام زوجك وأشخاص آخرين بسرقة الشيكات؟
ج: أنا معرفش هما بيجيبوا الشيكات والايصالات دي منين بس هو طليقي كان كاتب في العقد إن فيه حاجات فقدت منه بس ممكن اللي بيظهر ده اللي كان مفقود وبالتالي فممكن يكون ده اللي كان طليقي ذاكره في العقد إنه مفقود وظهر دلوقتي.
س. ما قولك فيما شهد به المحامي تامر أبو سريع بتحقيقات النيابة العامة باتهامك بعدم سداد إيصالات أمانة لصالحه؟
ج: أنا معرفش تامر أبو سريع ولا عمري شوفته ولا عمري مضيت له على أي إيصال وبالتالي لو هو معاه أي إيصال باسمي فأنا كنت بوقع على إيصالات وشيكات خلال فترة الزيجة مع وليد فطين فأنا كنت بوقع على الحاجات دي بصفته زوجي ووكيل أعمالي.
س. وما قولك فيما شهد به الرائد عمر زیدان إمام رئيس مباحث قسم شرطة المقطم؟
ج. أنا جوزي هشام ربيع مظلوم وهو لم يحرض أو يخطط لسرقة شيكات والكلام ده محصلش.
س: ما قولك فيما أقر به المتهم هشام ربيع بتحقيقات النيابة العامة؟
ج: أيوه هو ده اللي حصل زي ما قال هشام لإن كفتة جاله المحل وقاله إن فيه شيكات خاصة بزوجتك بوسي فبناء على ده هشام خلى مدير أعماله هو اللي يتعامل مع كفتة علشان يشوف الشيكات والأوراق وإيصالات الأمانة.
س: هل دار حوار بينك وبين سالف الذكر بشأن ذلك؟
ج: لا هو متكلمش معايا في أي حاجة لإنه كان مستني مدير أعمال جوزي يرد عليه باللي تم في الاتفاق وبيتأكد إذا كان فيه ورق ولا لا.
س: وما قولك فيما شهد به طليقك وليد فطين بتحقيقات النيابة واتهامه لزوجك بسرقة الشيكات؟
ج: كل كلامه ده كذب وغير صحيح هو مضى العقد المؤرخ في 10-6- 2020 بمحض إرادته ولم يكن تحت أي إكراه وواخد مبلغ 5 ملايين جنيه مقابل ده والعقد ده كان يشمل عدم وجود أي شيكات أو إيصالات أو دعاوى مدنية أخرى وفي حالة ظهور أي حاجة يكون هو المسؤول قانونيا عن ده وأنا على حد علمي إن مفيش أي شيكات معاه أصلا وهو اللي بعت كفتة لهشام جوزي.
س: بمَ تبررين ادعاءه بذلك؟
ج: أنا معرفش هو بيقول كده ليه وأنا نفسي أشوف الشيكات دي فين أصلا لإني في 2020 استلمت منه الشيكات والإيصالات وكان قايلي إنه مفيش أي حاجة تاني.
س: وأين يوجد أصل عقد التصالح المؤرخ في 10-6- 2020.
ج: معايا العقد ده
س: وأين تم تحرير ذلك العقد؟
ج: أنا مش متذكرة العقد ده اتعمل فين بس هو فيه طرف شاهد عليه وهو محمود الليثي المغني.
س: هل وقع وليد محمد عاشور "فطين" على ذلك العقد برغبته؟
ج: أيوه هو وقع برغبته بعد ما أخد الفلوس.
