إسماعيل فرغلي يكشف تفاصيل إصابته بورم في الأحبال الصوتية
تحدث الفنان إسماعيل فرغلي عن فترة مرضه خلال الفترة الماضية، وذلك في أثناء تصويره مسلسل مكتوب عليا مع الفنان أكرم حسني.
وقال إسماعيل فرغلي خلال تصريحات تلفزيونية: جالي ورم في زوري وربنا نجاني منه، كان على أحبالي الصوتية ووقتها كنت بصور مسلسل مكتوب عليا.. روحت لدكتور صحبي قالي أنت كويس بس في حباية صغيرة بس طالعة، وقالي أشوف الغدة، وعملت إشاعة على الغدة وقالوا في وشي ورم ولازم تشيله.
وتابع إسماعيل: قولت إني بصور مسلسل قالولي حياتك ولا المسلسل فربنا كرمني بدكتور محترم قالي خلص مسلسلك وعيد ونعملها لما دخلت المستشفى قولت لمراتي مفيش مخلوق يقولي سلامتك ولاحد يكلمني سبيني مع اللي خلقني؛ لأن قالوا لي الورم كبير على الأحبال الصوتية فلو مفيش دكتور كويس الأحبال الصوتية ممكن تتشال.
وأضاف إسماعيل فرغلي: لما فوقت من العملية كنت خايف أتكلم ملقيش صوتي فقولت الحمد لله وأنا مكنتش أعرف صوتي راح ولا طلع ولا إيه لحد بعدها بأسبوع بنشوف المرض ده طلع حميد الحمد لله، وكنت بصلي وأنا مكسوف ادعي بقول لربنا كفاية اللي أنت عملته معايا.
وفي سياق آخر، تحدث إسماعيل عن علاقته بزوجتة حيث قال: مراتي دي بقالي معاها 26 سنة، ويعني مش لاقي حاجة تساهل أقول عليها إيه، كتر خيرها وبقول للناس تدعيلها ربنا يشفيها لأن دي الرزق اللي بجد.
واستكمل إسماعيل فرغلي حديثه، قائلًا: أنا ربنا مدنيش فلوس بس اداني اللي أحسن من الفلوس؛ لأن ممكن يكون معاك مليارات ومتعرفش تعيش أنا بجنيه بعيش بألف بعيش مفيش برضوا بعيش، وهي عمرها ما طلبت الطلاق مرة بس قالتلي كلمة وجعتني أوي قالتلي أنا قلبي وجعني من قلة الفلوس.
