المتهم بإنهاء حياة زوجته بالنزهة: الغيرة السبب.. وكتبت صبي مجهول باسمي لأنها مبتخلفش| تحقيقات
كشفت التحقيقات في القضية رقم 1071 لسنة 2022 كلي شرق القاهرة والمتهم فيها حسن.أ 43 سنة بقتل زوجته باستخدام سلاح أبيض بسبب شكة في سلوكها وإثر مشادة كلامية بينهما أخرج سلاح أبيض وانهي حياتها بمنطقة النزهة.
قاتل زوجته بالنزهة أمام جهات التحقيق
وحصل القاهرة 24 على نص أقوال المتهم وجاء كالتالي:
قال المتهم أمام جهات التحقيق: اللي حصل إني أنا متجوز المجني عليها من 18 سنة وسافرنا مع بعض السعودية واشتغلنا هناك وحالتنا المادية كانت كويسة جدا، ورجعنا مصر ودخلت شراكة في بناء العمارة اللي أنا ساكن فيها دلوقتي ودخلت مع شريك في كافيه تحت العمارة، وكان كل لما تحمل تسقط لفينا على دكاترة كتير مكناش لاقين حل للموضوع ده، وأنا كان نفسي يكون ليا ابن.
وأضاف المتهم أمام جهات التحقيق: من 6 سنين كده واحد صاحبي من عين شمس عنده محل كاوتش عربيات لقي ناس بيرموا عيل في الشارع فاخده منهم وكلمني في التليفون وقالى إنه لقي عيل في الشارع وكان لسه مولود وهو عارف موضوع الحمل والتسقيط ده فقالي خده ربيه فخدته منه وروحت مكتب صحة عين شمس وخدت من ناس قدام المكتب إخطار ولادة روحت سجلته بأسمي أنا وزوجتي المجني عليها على أنه أبننا وخدته ربيته وعاش معانا.
قتلتها عشان بتغير عليا وخلتني كتبت صبي مجهول باسمي لأنها مبتخلفش
وأكمل المتهم بقتل زوجته: بعد كده حصلت ما بينا مشاكل بسبب أنها كانت بتتضايق من أن في ستات بيكلموني بحكم شغلي في الكافيه علشان يحجزوا أماكن للمناسبات وكنت أوقات بضربها كانت بتغضب وبتروح لأهلها وبروح أرجعها وأول أمبارح حصلت مشكلة ما بينا وخنقتها ولقيتها أمبارح على العصر كده بتكلمنى بتقولى أنها هتروح عند أختها وهتسيب البيت فأنا طلعت علشان أحاول أمنعها ومتمشيش فشدينا مع بعض في الكلام وأنا اتعصبت لقيت نفسي بجيب المطواة من الدولاب وروحت داخل عليها المطبخ وفضلت اخبط فيها لحد ما وقعت على الأرض.
وفي وقت سابق قضت محكمة شمال القاهرة بمعاقبة المتهم حسن.أ بالإعدام شنقا وذلك لاتهامه بقتل زوجته بمنطقة النزهة ومعاقبة بالسجن المشدد 3 سنوات وغرامة 10 آلاف جنيه بتهمة تعاطي المواد المخدرة.
